選舉事務處陸續公開立法會選舉參選人嘅選舉開支，其中參選俗稱「超級區議會」嘅元朗本土派區議員王百羽嘅選舉總開支約489萬元，震驚社會，一看之下，原來當中包括400幾萬元係由一間公司捐贈嘅服務，當中「主要形象發展及名稱設計」55萬元、化妝10萬元、選舉情况分析約30.8萬元等，搞到有人質疑選舉舞弊要向廉署舉報。呢件事實情係點，或者要交由執法部門調查，廣男睇新聞留意到，原來其他本土派包括黃之鋒、袁嘉蔚等人嘅選舉開支，都非常值得關注。

黃之鋒的助理「很貴」

根據傳媒報道，參選九龍東嘅黃之鋒，選舉開支達50.4萬元，超過33萬元花費喺七位選舉助理及代理人，當中前香港眾志主席林朗彥嘅薪金就高達12萬元；而出選港島區嘅袁嘉蔚，選舉開支為60.5萬元，當中42.1萬元用喺26名選舉助理及代理人，而前香港眾志副主席鄭家朗就收取4.8萬元嘅薪金。一個助理12萬元，係咩玩法？又或者，一個參選人要請26個人，又係咩玩法？

撇除黃之鋒等人嘅實際支出係幾多、咩公司捐贈俾佢哋嘅問題，廣男實在唔明白，請一個助理，要用12萬元？廣男雖然唔係政界中人，但請一個助理要用呢個數，咁林朗彥嘅價錢咪拍得住一個政府嘅政治助理？點解袁嘉蔚請鄭家朗用4.8萬元，而黃之鋒請林朗彥就要用12萬元呢？

至於袁嘉蔚，佢參選嘅係港島區立法會選舉，既唔係要跑勻全港嘅「超級區議會」議席，亦唔係選緊特首，選舉提名期結束左右一段時間，就聘請咗26人，合唔合理呢？

應該要徹查選舉開支

有人質疑班攬炒派「狂報」選舉開支係益自己友，呢一點值得商榷，但廣男想講，今次黃之鋒、袁嘉蔚等人申報嘅開支，如果最後係會問政府「攞返錢」，咁就會變成公帑「找數」；退一步講，就算唔係公帑找數，都可能公司捐贈款項，最後「不合理」地落咗攬炒派人士口袋，選舉相關部門應該審慎核查呢啲開支，如果遇到唔合理嘅帳目，唔應該接受申報。大家話攬炒派到底玩緊乜？背後有咩盤算呢？

原圖：黃之鋒fb

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk