前排，當攬炒派無視民調結果顯示大部分市民想佢哋「執包袱」走人，自行決定延任立法會議員，當時佢哋講過其中一項主要工作，就係「爭取被中國扣留的12港人返港」；當時，囍雨以為佢哋得個講字，根本唔會救人，但原來囍雨錯喇，佢哋日前喺立法會會議，竟然有議員喺委員會主席選舉嘅選票上，寫上「SAVE 12」等字眼，用呢種方式「勇救」喺內地嘅「12瞞逃」，夠唔夠大膽？問你服未？

被支持者恥笑

對於攬炒派呢個「寫字救人」嘅情節，唔單止「感動」到囍雨，連攬炒派支持者，睇嚟就相當之「感動」，喺向來支持攬炒派嘅新聞媒體發帖下，囍雨睇到好多網民留言，包括「估唔到入去係咁抗爭，好有創意呀」、「抗爭非常精彩，大開眼界」、「原來留低係為咗做小學雞野，議會戰線真係好有用」、「立會議員（抗爭模式）好型」以及「留多年逗十皮一個月就係做呢d野」等等，簡單嚟講，一班支持者就係覺得班攬炒派「無料到」！

曾經有分析指，攬炒派今次留任，因為要向選民「交代」，預料佢哋嘅抗爭喺未來會更加「激烈」，但囍雨睇相關會議，反而覺得成班攬炒派都「好乖」，唔見佢哋有咩衝擊，最多喺提名主席過程「互相提名」下，扮下嘢，到最後投票時，就喺選票「寫字」抗爭，咁難怪連支持者都嫌棄佢哋，因為佢哋嘅所謂「議會抗爭」，非常之「流」，而且俾人感覺似「Hea做」逗人工。

之前公民黨立法會議員郭榮鏗做內委會主持，主持咗會議16、17次都選唔到主席，拖足7個月，依家《港區國安法》通過，一次會議就選出主席，足見《港區國安法》震懾力十足，亦反映攬炒派所謂「議會抗爭」，已經變得蒼白無力，甚麼「阻擋惡法」、「全力要求重啟選舉」、「阻止大灣區投票」等，大家又不妨睇下佢哋點「阻」法。

舉牌式抗爭

今日，囍雨仲睇到單新聞講《施政報告》，內容係工黨立法會議員張超雄表示「向林鄭舉牌發聲」，內容關於「工黨張超雄承認，面對有權用盡的政府，抗議比以往困難，他傾向『合理、不暴力』的形式，以語言和標語抗議」；舉牌式抗爭，真係聽到人「膽顫心驚」，原來，留任一年，賺四百萬薪酬同辦事處開支津貼，「就係咁簡單」，實在佩服！

原圖：中通社

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk