之前攬炒派議員為咗延任，可以話係「扭盡六壬」，最後將門檻設計到極度符合自己利益，都無過半「支持者」支持佢哋留任，佢哋就自行作出「政治決定」，為咗「守住議會」，選擇留下。唔知大家記唔記得，喺佢哋表明要留任嘅時候，講過要「阻止大灣區投票」，最近，當傳出政府正研究方便大灣區港人投票嘅時候，一班攬炒派政客梗係要「撲出嚟」反對啦！廣男就喺度諗，攬炒派依家算唔算係兌現「留任承諾」呢？
理由多多 就是「反中」？
睇返《生果報》報道，攬炒派反對俾住喺大灣區港人投票嘅理由，真係「層出不窮」，喺呢度，廣男節錄幾句俾大家睇下：
胡志偉擔心，民主派參選人如到內地拉票，隨時變自動「送中」；部份被拒發回鄉證的民主派人士亦難以進入內地展開拉票工程。
林卓廷質疑譚耀宗等建制派人士只准大灣區港人投票，卻不准居於海外和台灣的港人投票的說法：「台灣對佢哋（譚耀宗、吳秋北）嚟講唔係『一國』範圍咩？佢哋係咪搞緊台獨？」
公民黨法律界議員郭榮鏗指，若然民主派參選人在今次大灣區投票安排中未能接觸大灣區選民，將嚴重剝削候選人應有權利，有關問題將成為提出司法覆核的理據。
大家睇到，攬炒派議員其中一個理由，就係就算俾佢哋返到大灣區拉票，都驚會變成自動「送中」，咁廣男又想問下，佢哋有做過啲咩違法嘢或者係有違《港區國安法》，做乜咁驚「送中」？如果怕中國，咁點解又要做中華人民共和國香港特別行政區嘅立法會議會，選擇「留任」？
攬炒派笑點，當然唔止咁多，當林卓廷質疑點解只係俾大灣區港人投票，而不准海外同台灣嘅港人投票時，廣男想問下，外國同台灣居住嘅港人都無得攞高齡津貼同長者生活津貼，用林卓廷嘅套路，港府係咪要撤銷港人喺內地嘅福利？如果係，唔該林卓廷講清楚，唔好避，等大家可以幫民主黨宣傳下「政績」嘛！
說到底 就是政治操作
攬炒派點解將呢個議題「放到咁大」，真係為咗「選舉公平」？講到底，係為咗自己議席，熟悉內地情況嘅大灣區港人，根本就唔buy佢哋果套，即係話一切都係政治或選舉操作！其實要預測攬炒派議員嘅行為，非常簡單，只要判斷下咩對佢哋保住議席「有利」，大家就會諗到佢哋會做咩啦，之前一場「留任」政治騷，已經清楚說明一切。
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論