九龍塘宣道小學因為有「播獨」教師被釘牌而受到全城關注，攬炒派包括教協近乎係全力為「播獨」教師護航；近日，又有一班校友同家長發表聯署聲明，力挺該名教師。囍雨睇到聯署聲明嘅開頭以至主題，就有提到「言論自由」、「自由交流的學習模式」等等為「播獨」教師開脫，囍雨質疑，宣揚「港獨」，真係言論自由咩？
是宣傳 不是交流
教友、家長想支持教師，囍雨絕對理解，但大家應該留意下教案或其他教學材料，當中係有計劃地花大量時間介紹「港獨」組織嘅宗旨同政綱，甚至係要學生表態，問心，花咁多時間介紹「港獨」組織，真係無問題？小五學生，可以理解到「港獨」思想？甚或，咁樣宣傳「港獨」，真係關自由事？
坦白講，今時今日，如果有人宣揚「港獨」，就會係觸犯《港區國安法》，刑責相當之重；就算時間回到去年3月，《港區國安法》未立法同生效，其實宣揚「港獨」訊息，係不符《基本法》訂明香港嘅地位，所以囍雨一直懷疑，就算有「言論自由」，都唔應該宣揚「港獨」，就好似國際公約訂明有言論、集會等自由，但都唔可以危及社會秩序、國家安全一樣。
首要保護學生
換個角度，今日有教師「宣獨」，有家長、校友覺得「無問題」，教協又話教學主題係「言論自由」，咁囍雨想問，如果教案係叫人支持中央政府施政，教協會唔會又話係洗腦教育？點解關於國家、政府好嘅嘢就係洗腦，而關乎極端思想甚至「港獨」思想就可以？因為有啲人嘅諗法，就係教師灌輸反政府思想，「可以」；但要說好國家、港府，就係「洗腦」，呢個又係典型嘅攬炒派思想！
最後，囍雨留意到聲明有地方有提到「學生利益」，其實點先為學生利益好？可能有校友、家長會認為「夠自由」，就係好；但係，如果因為呢種「自由交流的學習模式」，校友、家長嘅子女受到激進化，繼而成為咗「衝衝子」，面臨長期監禁，校友們、家長們，仲會支持呢種學習（其實係荼毒）？政治意見，可以人言人殊，但保護好學生，社會應該係一致嘅，就係唔可以俾學生接觸到極端甚或違法嘅思想，如果社會守唔住呢條線，教育界必定崩壞。
原圖：九龍塘宣道小學官網、網絡圖片
請Follow我們的YouTube頻道：
下載我們的手機應用程式，收看第一手精彩內容：
評論