關於九龍塘宣道小學一名「播獨」教師被「釘牌」一事，近日社會已經有「方方面面」嘅討論，其中向來「支持」失德教師嘅人，有啲就話「懲罰過重」，有啲就話教師教案主題係「言論自由」，對於呢啲非常牽強嘅理由，廣男只想回應一句，包庇夠未？係咪要包庇到失德教師成為「教育界主流」，先係對學生好？

完全與言論自由無關！

言論自由，有時的確係失德教師甚至攬炒派政客嘅「最佳擋箭牌」，不過，今次失德教師利用教案、工作紙等「播獨」，同言論自由無關；因為花咁多時間去介紹「港獨」組織，甚至談及「藏、疆、台」獨，擺明係宣傳緊分裂國家嘅訊息，請唔好以言論自由做擋箭牌！再者，「港獨」問題，涉及到國家安全、領土完整，即使係攬炒派認可嘅國際公約，都講到涉及國家安全、社會秩序等問題，自由係會受到限制；換句話說，有言論等自由，亦不等於可以危害國家、社會安全同秩序。

至於取消教師註冊或者俗稱「釘牌」係咪罰得重嘅問題，廣男請大家考慮兩點，第一點，就係如果係《港區國安法》生效後發生呢件事，呢個教師就唔止係面臨「釘牌」，而係面臨可能觸犯到《港區國安法》嘅刑責；第二點，教師利用教材向學生灌輸極端、不符《基本法》甚或可能引起反政府抗爭嘅思想，取消其教師註冊，唔合理咩？呢個又警告，果個又警告，最後無一個失德教師被「釘牌」，只怕教育局會成為「無牙老虎」，校園則繼續「中門大開」，俾失德教師「播獨」同散播極端思想。

教育是為了下一代

所以，失德教師就有如教師隊伍入面嘅「超級帶菌者」，必須將佢哋「隔離」。大家諗真啲，教育到底係咩一回事？辦教育，唔係為咗教師嘅生計或者工作需要，而係為咗教育好我哋嘅下一代，「播獨」甚至散播仇恨嘅教師，我哋點可以俾佢哋留喺教育界？教師天職，就係教導好學生，向佢哋灌輸正確嘅訊息，如果有教師連呢一點都做唔到，咁我哋用公帑俾呢啲教師去教書，實無異於俾資源佢哋「毒害」下一代。 

圖片來源：九龍塘宣道小學網頁、網上圖片

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk