資訊發達、言論自由嘅年代，大家有冇發覺，如果有人要「講故事」，其中最好用嘅幾個字，叫「知情人士」、「據透露」、「消息指」…講完就係、你信就得；至於真相，已經失焦、被掩蓋…
教育局噚日開記者會，講述釘牌九龍塘宣道小學一名播獨教師嘅詳情。廣男聽完一眾黃媒、黃記連番針對官員「審問式」嘅提問，基本上已經估得到，肯定有人借機大造文章。果然，今日睇網絡睇新聞，唔少報道、貼文都著墨演繹緊「教育局追殺」、「教育局砌生豬肉」，廣男喺度不妨引述少少俾大家睇。
「知情人士」演繹的劇本
例如，「知情人士」透露：「涉事教材教學重點為『言論自由』…學生亦指出老師是與他們討論言論自由，更表明不支持港獨」，「取消註冊的教師本身非常受學生歡迎」；另一個「知情老師」就話：「校方訪問學生及家長『都唔覺得有任何問題』」，「教育局由頭到尾，沒有與涉事老師會面及聽取申訴」；仲有「消息指」：涉事的是該校『生活教育科』課堂，被取消註冊教師過往曾教授該科等等。由頭到尾，都係唔同嘅「知情人士」、唔同嘅「消息透露」。
廣男真係大開眼界。呢單性質咁嚴重咁惡劣嘅教師專業失德事件，當初如果唔係因為有家長投訴、有媒體追查，可能其他家長、教師以至社會大眾都仲蒙在鼓裡；依家涉事教師被釘牌，霎時間原來有咁多「知情者」？呢啲知情者姓甚名誰？冇人知；如何知情、消息何來？都冇人知！廣男想問，教師有問題，幾時先輪到利益最密切相關嘅學生、家長第一時間做番次知情者？！
一句「知情人士」、「消息透露」，冇人講過一句，點解涉事教師要喺教案、課堂播放「香港民族黨」呢個港獨組織嘅政綱，點解要向小五生觸及「藏獨」、「疆獨」、「台獨」呢啲大人都未必講得透嘅議題，更要學生舉手表態！外界亦都冇追問過涉事教師點解要學生作政治表態，但就七嘴八舌拼湊出另一個「教局追殺、砌生豬肉」嘅劇本。廣男請問教育局嘅官員，睇到嗎？呢個，就係手握資料但又唔肯公開嘅結果，你唔講出真相，人哋就用各種「消息」掩蓋真相！咁樣嘅結果，對學生、家長、同校其他教師，以至整個社會，公道咩？
攤開全部事實 讓社會判斷吧！
對於終於有失德教師被釘牌，有人寄予厚望，有人話仲會「陸續有來」，係咪真？廣男唔知，但就肯定，若要對教育亂象撥亂反正、正本清源，絕對會係一場「硬仗」。廣男真心認為，教育局應該公開所有被裁定專業失當嘅教師、涉事學校名稱，以及個案內容，不如，就理直氣壯攤開所有事實，俾社會大眾判斷吧！就如同防疫抗疫，你唔透明公開確診數字、公布疫區疫廈，大眾其實好難知道事情有幾嚴重。
避事，從來唔會「少一事」；如果做正確嘅事，都要遮遮掩掩、唔可以下定決心，其實依然好難俾人「睇到希望」。
原圖：中新社、rthk
請Follow我們的YouTube頻道：
下載我們的手機應用程式，收看第一手精彩內容：
評論