廣男今日睇報道，有份策動多項攬炒亂港行動嘅「我要攬炒」團隊發起人「攬炒巴」，噚晚首次喺網上以真面目示人。據報真名為劉祖迪嘅「攬炒巴」，證實自己連同另外5人現正被通緝，但就由頭到尾唔肯講自己依家身在何方，又話自己今次現真身，係要表明已經「重新振作」，仲好豪氣咁款話「不自由，毋寧死，不惜攬炒，都要同中共相搏到底！」其實廣男依家最有興趣想知嘅係，劉祖迪係咪已經著草潛逃先？如果係，咁香港班「手足」點算？又被你遺棄咗？
叫人攬炒 自己走佬？
對於劉祖迪所謂嘅「不自由、毋寧死、相搏到底」，廣男聽落，講就的確「兇狠」，梗係啦，如果劉祖迪真係已經順利著草出逃，佢自己就「自由咗、唔使死」，用把口當然可以「相搏到底」，但個問題係，你自己就喺其他地方「重新振作」，但又叫香港班「手足」繼續「攬炒」？即係點？講白啲，咁同叫人衝、自己鬆有乜分別？
煽動顛覆中共政權？
廣男留意到，據報劉祖迪仲提出所謂「四大光復主軸」，其中包括「游說國際圍堵中共政權，撼動共產黨統治根基」、「推動在聯合國、G7集團等國際下的香港自治」、「聯同國際盟友推動真正『民族自決』」等等，大家睇真啲，按照咁嘅表述，劉祖迪想達至嘅，唔單止係要「香港自由」、而係「香港自治、香港獨立」，以至動搖中央政權喎！再諗落去，劉祖迪就「出把口」，但如果其他人附和佢、信從佢，甚至將佢講嘅嘢付諸行動，咁隨時已經觸犯國安法，根本等於自動「送頭」、自投法網，呢啲，咩就係「精人」同「笨人」之分囉！
其實，廣男每次睇到所謂「抗爭領袖」著草潛逃的故事，例如羅冠聰又好、張崑陽又好，無論佢哋「出到去」之後，講得幾好聽、幾逼不得已又或者「義蓋雲天」都好，都掩蓋唔到佢哋走佬嘅本質，掩蓋唔到一個又一個黑暴敗走嘅本質。簡單一問，如果真係咁「正義」，點解選擇著草？如果真係「抗爭」，點解連對自己做過嘅嘢負責嘅勇氣都冇？甚至連自己身在何處都唔敢講俾人聽？所以，對於被人遺棄嘅「手足」以至其他港人，真係應該好好諗清楚，呢啲「前車之鑒」，係咪自己想要嘅結果？
請Follow我們的YouTube頻道：
下載我們的手機應用程式，收看第一手精彩內容：
評論