由全國政協副主席、前特首梁振英牽頭成立嘅「803基金會」日前申請司法覆核，要求法庭下令教育局公開被裁定專業操守失當嘅教師姓名、涉事學校名單同案件細節；向來十分「保護」失德教師嘅教育局局長楊潤雄，接受訪問時就稱局方一直按嚴謹程序處理有關教師投訴，「務求達到不枉不縱」、「覺得應該給老師一個機會做好他們的工作，在教學上使學生得益」。對於楊潤雄嘅一番辯解，囍雨只想問一句，教育局俾機會失德教師，咁邊個俾機會可能受影響嘅學生以至家長？
是不枉不縱 還是寧縱莫枉？
對於楊潤雄嘅一番回應，囍雨首先充滿疑問嘅係，教育局處理教師投訴係「不枉不縱」？如果係真嘅話，教育局由去年六月至今年六月接獲200幾宗有關教師喺社會事件涉嫌專業失當嘅投訴，大致完成180宗個案調查，其中唔成立嘅為63宗，囍雨暫且唔計啲無交代點處理嘅投訴，喺咁多宗「已成立」嘅投訴當中，點解無一宗係取消教師註冊？所謂「不縱」，就係咁多教師失德，但個個都可以繼續做教師？
囍雨睇完楊潤雄回應記者嘅說法，個觀感就係楊潤雄非常「保護」老師，但問題嚟喇，楊潤雄、教育局以至政府「保護」教師，咁邊個嚟保護學生同家長嘅利益？楊潤雄以至教育局，好明顯就係企咗喺教師一邊，但係教師失德、散播仇恨，最影響嘅就係學生，喺過去一年嘅黑暴運動當中，就有近4,000名學生被捕，佢哋當中肯定有人受過偏頗、偏激嘅教師影響；依家青年、學生犯法成為常態，楊潤雄仲要保護教師而唔係保護學生？真係令人百思不得其解！
教育界不止要「保就業」
教育界、學校存在嘅目的，唔係為咗要保住教師或者「促進」就業，每一個教育界人士，都必須教好青年，除咗要向學生灌輸正確訊息之外，社會亦要求教師以身作則、做好榜樣！隨舉一例，如果有學生、家長因為唔知學校有失德教師，學生被荼毒，繼而走上違法達義之路，咁學生就會前程盡毁，而整個家庭嘅福祉亦會大大受損。楊潤雄可能無呢種「切膚之痛」，但佢必須知道，有數以千計嘅學生、其家人，正正受到呢種煎熬。公開失德教師名單、涉事學校，絕對刻不容緩！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論