留任？辭職？做民調？攬炒派為咗延任搞咗一場「民調大龍鳯」，最後結果，當然係留任啦！老實講，有啲人覺得攬炒派立法會議員極為肉酸，囍雨抱一個「打工仔」心態，覺得呢班議員都係「打份工」，由佢啦！不過，攬炒派講到個民調好「意見紛紜」，佢哋要做政治決定云云，囍雨睇下份民調內容，睇真啲，發現真正嘅民意，根本係想佢哋離任，佢哋將個門檻set到最窄，然後無視民意話支持者意見唔過門檻而「決定延任」，簡直就係侮辱咗市民嘅智慧！
300多人支持留任？
首先，呢份民調雖然號稱訪問咗超過2,500人，但攬炒派真正會計算、考慮同參考嘅，就只係738人嘅「民主派支持者組群」意見，當中有335人、即47.1%支持佢哋留任；嘩，300幾人就係民意？會唔會「太多」呀？況且只係計算738人嘅意見，誤差可能有3%至4%，其實真正嚟講，民意根本無授權佢哋留低；如果留任係政治決定，咁一開始就唔駛做民調啦！
當大家以為300幾人支持佢哋留任成為佢哋「門檻不達，自行決定」嘅荒謬，囍雨想講呢一點仲未算，因為囍雨睇整個訪問了2,500人的調查結果，仲驚人，為咗令大家睇得清楚啲，囍雨列點比大家睇下：
48.1%「傾向民主派」受訪者反對留任/支持辭職; 支持留任/反對辭職的只有43.9%
所有樣本中, 不論性別, 反對留任/支持辭職居多, 例如男性就有57.3%; 女性就有49.7%
所有樣本中, 不論年齡組別, 反對留任/支持辭職居多, 例如18-29歲受訪者為49.1%; 30-49歲受訪者為50.8%; 50歲以上受訪者為56.3%
所有樣本中, 不論教育程度, 反對留任/支持辭職居多, 例如小學或以下教育程度受訪者為54.5%; 中學教育程度受訪者為54.8%;大專或以上程度受訪者為50.7%;
所有樣本中, 不論社會階層, 反對留任/支持辭職居多, 例如統稱「上層」受訪者為54.6%; 統稱「中層」受訪者為53.2%; 統稱「下層」受訪者為52.3%
簡單嚟講，就係傾向支持攬炒派嘅人，係想佢哋離任居多，而計及所有樣本，不論男女、年齡、教育程度等，都係想佢哋離任居多，其實係難得一次民意大團結；民主黨、公民黨等人剩係計「幾百個」支持者嘅意見，呢個民調，囍雨真心覺得「好有誠意、好真」！
依家攬炒派議員保住薪酬，可能以後要俾人「笑一世」，值唔值得，真係佢哋自己先知；囍雨反而喺度諗，佢哋作出留任嘅決定，其實係用「行動」接受咗人大常委會安排，對於呢一點，囍雨深感安慰，希望攬炒派以後喺議會認真議政、少啲搞事喇！
攬炒派延任係咪一個「大團圓」結局，要留返俾市民判斷，囍雨唯一肯定嘅係，供緊千萬元豪宅嘅民主黨立法會議員鄺俊宇以至其他「等錢用」嘅攬炒派議員，未來一年都唔駛擔心「無錢供樓、無飯開」；至於其他「手足」，包括喺台灣被扣查、下落不明嘅「手足」，由得佢哋「死」啦！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論