曾被外媒踢爆為「英國人」嘅《生果報》老闆黎智英，似乎對美國總統特朗普「情有獨鍾」，最近佢同一位時事評論員「對談」，稱若特朗普連任，未來一、兩年好大機會承認台灣為「主權國家」，仲話「香港人最後可能唔使咁腳軟……對香港前途好緊要、對世界自由都好緊要」。睇到黎智英呢番說話，囍雨想問下，黎智英其實係咪想「分裂」中國，借勢宣揚「台獨」呢？
對特朗普連任「感到樂觀」？
根據《生果報》嘅報道，黎智英對特朗普可以連任「感到樂觀」，對於黎智英嘅一番「想法」，囍雨真心唔明白，依家美國唔同民調都講特朗普落後，有啲民調仲顯示佢係落後「一大截」，黎智英「哪來的信心」，覺得特朗普會連任？定係黎智英嘅「信心」其實只係源於佢想特朗普贏，等特朗普可以繼續針對中國？
講真，特朗普贏定輸，囍雨唔敢講，始終一日未開票，一日都未知結果；不過，黎智英估計特朗普連任未來好大機會承認台灣為「主權國家」，囍雨就真心唔相信。好簡單，大部分國家包括中國，絕唔容許嘅亂象就係反動分子搞分裂國家，「台獨」可以話係國家一條唔可以踰越嘅紅線；就算特朗普成功連任，會為咗「支持」台灣而玩火？囍雨就唔信喇，黎智英講呢啲，似係想挑起矛盾多啲！
販賣「假希望」
再進一步去講，美國「支持」台灣，會「牽動到香港前途」？黎智英咁諗或者咁講，囍雨只能送黎智英一句，「唔好自High」啦！依家香港嘅形勢，直白啲講，就係中央、港府唔會再俾機會攬炒派政客、黑暴分子搗亂，唔好講台灣咩形勢，就算台灣嘅政府得到美國「支援」，都唔會影響到香港。黎智英咁講係咪想派「定心丸」俾攬炒派支持者，囍雨唔肯定，但講到攬炒派、反政府運動「仲有希望」咁，似係呃人多啲囉。
對於黎智英嘅一番「分析」，囍雨估計唔少黑暴支持者會選擇「相信」，但囍雨要提提各位，一年前開始，黎智英以至《生果報》，都有「鼓勵」抗爭、叫人上街，結果呢？結果就係黑暴運動中，過萬人被捕，當中近4,000人為學生。相信黎智英？大家先問下黎智英會唔會叫自己仔女去抗爭先啦！
圖片來源：中通社
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論