「張父問兒子：『你為乜嘢爭取？』兒子鏗鏘回答：『為下一代。』」
「臨別前幾日，他主動提出與媽媽合照…過往母親生日，他總會親手為她製作芝士蛋糕，一邊對母親唱『世上只有媽媽好』。」
「在他在準備離開故土前，鼓起勇氣向心儀女生表白…」
「這個『孝順仔』在離開前不久，才自掏腰包買下一部新電話送給媽媽當作生日禮物…」
驟眼睇，呢啲描述別情依依嘅故事，係咪好淒美、好感人？但如果廣男唔開名，大家又估唔估到，呢啲「別離故事」嘅前傳，係有人涉嫌嚴重罪行、逃避法律制裁、畏罪潛逃事敗、因為偷越邊境被內地警方扣查？
話說「12瞞逃」自動「送中」之後，有人喺網上為佢哋開咗個「全球聯署：要求中國政府送返12名被捕港人」嘅page，一邊日日叫大家「記住佢哋」，一邊日日攻訐內地「秘密關押」、港府「毫無作為」，要求內地「放人」，除此之外，就係幫12重犯一人「度身訂造」一個淒美故事，吸睛博同情。廣男見到，前香港眾志秘書長黃之鋒亦都即趁機抽水，一個唔該、將個page「複製貼上」到自己Facebook，其中一句，係「佢哋喺香港比人告緊嘅係咩我唔多講，大家只需要知佢哋都係一班愛香港嘅後生仔」…
黃之鋒點解唔講落去？
咪住先，廣男想問下，點解唔講控告咩罪？黃之鋒點解唔同大家講，呢班「愛香港嘅後生仔」，有人涉違《港區國安法》，有人涉嫌暴動，有人涉嫌縱火，甚至有人涉嫌製造爆炸品、無牌管有槍械及彈藥？原來，條條重罪，都叫「愛香港」？明明畏罪潛逃、逃避刑責，反而被塑造成一個個「感人故事」？請問政客，呢種為極度重犯塗脂抹粉嘅伎倆，究竟係「幫緊」佢哋，定係幫自己食緊人血饅頭？抑或，仲想「鼓勵」更多後生仔「前赴後繼」？夠了吧！
當大家被呢啲煽情文字所感動之時，唔好忘記理智地反問一句，佢哋點解會落到今日呢步田地？廣男就話，當呢班人由當初選擇「違法達義」果一日開始，一直執迷不悟甚至明知故犯，就注定「有今日」、注定「冇未來」！政客、網上言論可以「歌頌」佢哋，但咁樣嘅代價，就係「害死」更加多嘅年輕人。廣男相信，如果冇人煽惑違法、冇人美化暴徒暴力，今時今日都未必至於有成萬人被捕，仲要包括近四千名學生。
持續黑暴 需要「義士」和「故事」
其實對於呢啲「故事」，廣男心中仲有好多疑問。究竟咩人寫？根據咩嚟寫？唔知；內地「秘密關押」？好似成件事，包括點解扣查、12犯人現狀係點、會點跟進處理等等，都係內地警方通報嘅喎！越諗落去，廣男就越發覺，相比之下，被台灣當局扣押果5位「手足」，真係已經冇嗮利用價值，連一個幫佢哋嘅政客、講下佢哋「同人唔同命」苦況嘅page都冇。
對於政客以至攬炒派嚟講，最需要嘅，係有「編撰價值」嘅故事，可以為黑暴運動保持熱度嘅「故事」，就如同當初嘅「8.31太子站事件」、「爆眼女」、「新屋嶺」、「沙嶺」等謊言…據聞，有人已經煽動緊嚟緊國慶假日，搞聲援「12瞞逃」嘅遊行，依家呢啲將佢哋美化成「義士」嘅故事，會否又係暴力登場前嘅「鋪排」？可以鼓動更多青年出嚟「送頭」？請攬炒派唔好再塑造惡毒嘅謊言了！
原圖：中通社、黃之鋒fb
請Follow我們的YouTube頻道：
下載我們的手機應用程式，收看第一手精彩內容：
評論