因為要求港府對內地「封關」等訴求，醫管局員工陣線（下稱「陣線」）喺疫情緊張嘅情況下發動醫護罷工，外界一直要求醫管局嚴肅處理事件，絕對唔能夠輕輕放過「抽香港」後腿嘅醫護。今日，有新聞報道指醫管局將發信俾幾千名今年二月參與罷工嘅醫護，要求佢哋解釋缺勤原因，再決定「如何處理」；發起罷工嘅「陣線」主席余慧明稱罷工係「合法工業行動」、會全力支援受影響同事「我哋（工會）發起得罷工行動，一定會負責任」。囍雨想問下，「陣線」發動罷工真係合法合理？

最需要醫護時罷工玩「脅逼」

囍雨先講「道理」，醫護嘅天職，就係醫人救人，喺世紀疫症當前，最緊要嘅就係救人；而「陣線」成員選擇喺果個時候罷工脅逼政府同醫管局，係咪合理呢？喺「陣線」幾大訴求當中，其中一個訴求就係要求政府對內地「封關」，如果中國出現疫情係要求對內地「封關」，咁其他國家疫情更嚴重時，點解我哋又唔見「陣線」罷工，要求對英、美等國封關，當中有冇政治考慮？

至於合法性問題，「陣線」聲稱佢哋嘅罷工係「合法工業行動」，但囍雨睇過另一說法，係話《基本法》雖然訂明港人有罷工權利，但按《僱傭條例》規定，罷工嘅保障係適用於僱員喺「適當時間」參加工會活動，當中包括「工作以外時間」同「在工作時間內得到僱主同意」嘅職工會活動；而根據《職工會條例》，「罷工」理應係關於「僱傭條款或條件」，「陣線」發起罷工既得唔到僱主認同，又同「僱傭條款或條件」無關，佢哋罷工係咪真係「合法工業行動」，真係值得商榷。

「陣線」支援你 還是「害死」你？

從報道當中，囍雨睇到余慧明話「陣線」將為同事提供回應局方發信的方式，並全力支援受影響同事，呢一種玩法，囍雨相信可能係「陣線」諮詢法律意見後，再教罷工醫護點樣回信或者「統一處理」；唔知點解，呢個做法令囍雨諗起前排公民黨成員報名參選立法會選舉，面對選舉主任提問嘅時候「耍」法律語言，結果幾個議員包括郭榮鏗、楊岳橋、郭家麒被DQ（提名資格被選舉主任裁定無效）。呢個世界有樣嘢叫「奸有奸輸」，「陣線」發動罷工本身已經理虧，依家去到呢個地步仲想「抗爭」、玩火，小心燒親自己呀！其實，搞罷工失敗，又累及其他醫護，「陣線」成員最應該做嘅，係辭去醫院職務嚟承擔責任！ 

原圖：RTHK

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk