喺台灣，有五名黑暴「手足」被扣押超過兩個月，但攬炒派政客完全唔理；而因為潛逃台灣喺內地水域被廣東海警截獲、扣留喺深圳嘅「12瞞逃」，攬炒派就出盡全力地要內地「放人」，呢兩日廣男睇新聞，仲見到民陣打算發起遊行，主題為「毋亡義士 釋放12」。廣男想問下，「12瞞逃」明明係犯咗重罪不想接受法律制裁嘅逃犯，幾時變咗做「義士」？民陣以至攬炒派，食「人血饅頭」嘅程度，竟然去到要將事件升級到「遊行」程度？仲要立即釋放佢哋？其實係想幫「12瞞逃」，定係想害佢哋呢？

他們都是逃犯

「手足」、「義士」等稱呼，攬炒派當然講得響亮，但廣男又要不厭其煩地講多次，「12瞞逃」並唔係咩「義士」，而係逃犯！佢哋12人當中，據報每個都「有案在身」，有人涉嫌違反《港區國安法》，有人涉嫌暴動，有人涉嫌縱火，有人涉嫌製造爆炸品甚至有人涉嫌無牌管有槍械及彈藥等條條重罪。攬炒派可以全力去「美化」佢哋，但無論攬炒派點講，都改變唔到佢哋係逃犯甚至「重犯」嘅本質！

再者，民陣以至攬炒派政客要求內地「放人」，根本就唔合理；「12瞞逃」因為偷渡被內地海警拘捕，就算要內地「交人」，最起碼都要等內地部門以至法院審理好佢哋嘅偷渡入境相關罪行，以至喺內地「承擔罪責」找咗數先；之後再將「12瞞逃」移交俾香港執法部門，先係合法合情合理。

食盡「人血饅頭」

依家攬炒派、民陣等「大合奏」，不斷向內地部門叫陣，坦白講，廣男覺得攬炒派似係「玩」緊「12瞞逃」多啲；不斷挑戰甚至抹黑內地部門，對案件有好處咩？除非攬炒派一心只係諗住食「人血饅頭」，睇下可唔可以借機炒起「風波」繼而反政府，收取政治紅利，否則佢哋依家咁玩法，就算對佢哋「個人名氣」有幫助，都唔可能幫到「12瞞逃」。

至於「12瞞逃」嘅家屬，真係要諗下攬炒派班政客到底係幫緊你哋，定係「利用」緊你哋；大家要記住一點，攬炒派政客出手，未必可以搞好件事，但往往一定會「搞大件事」，甚至搞到收唔到科，呢個近乎係歷史「定律」。 

原圖：民陣fb、rthk

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk