古語有云：兄弟如手足、夫妻如衣服。呢兩年，講「手足」兩個字講得最多嘅，就包括班攬炒派政客，但實際上，呢兩個字對佢哋又意味住啲咩呢？
囍雨之所以講起呢樣嘢，源於5名喺香港涉嫌干犯重罪嘅黑暴分子，兩個多月前偷渡台灣之後，就至今音訊全無，最近先至聽聞佢哋因為非法入境台灣，被台灣嘅陸委會扣押喺高雄，但現狀係點，唔知；台灣打算點處理佢哋，唔知；甚至5個人姓甚名誰都冇公布過，囍雨講句難聽啲，佢哋依家係生係死都未知。令囍雨覺得最奇嘅係，咁大單嘢，點解又好似完全唔見有一個攬炒派政客，企出嚟幫「手足」出句聲、跟進下呢？
48小時過去 22攬炒派無人覆半句
日前網媒《港人講地》專門就台灣「手足」情況，以文字短訊形式詢問22名攬炒派立法會議員回應，問佢哋「如何看待事件？」同埋「會否作出跟進？」，點知過咗48個小時之後，結果竟然係，22人之中冇一個人回覆過半個字。囍雨真係唔理解，同樣係「手足」，同樣係偷渡台灣事敗，點解班攬炒派議員喺「12瞞逃」事件上咁高調積極「幫手」，但對被台灣扣押果5個人，態度就咁差天共地呢？
講真，上述兩條問題，有冇咁難答啊？囍雨喺度諗，就算班政客點樣「考慮周全」都好，最起碼都可以講句「希望台灣保障佢哋人身安全」、「希望台灣公布5人姓名、現狀」…但就點都估唔到，佢哋係連答都唔答、理都唔理。對於《港人講地》記者send出嘅提問短訊，呢排好「盡心盡力」幫「12瞞逃」家屬嘅涂謹申和朱凱廸，手機顯示為灰色雙剔（即訊息已送達，但未有顯示是否已讀）；而曾經擺街站聲援「12瞞逃」嘅林卓廷、以及曾借事件抽水嘅黃碧雲，更加顯示為雙藍剔，即係已讀不回。囍雨想問下，班攬炒派議員就係咁樣對「手足」？以前就話「齊上齊落」、「核爆都唔割」，依家連嗌下口號都費事、已經將佢哋完全拋棄？！
「幫與不幫」 視乎有無反中價值？
客觀講，囍雨覺得5名台灣港人同「12瞞逃」事件，本質上其實冇乜唔同，最大嘅分別，就係一個被台灣扣查，一個被內地扣查，但點解攬炒派唯獨喺「12瞞逃」身上咁落力呢？又幫家屬開記者招待會、又擺街站聲援，甚至帶埋部分家屬去警察總部報警、仲想查埋有冇內地警方進入香港水域「跨境執法」。如果你問囍雨，囍雨唯一可以諗到嘅解釋，就係「12瞞逃」身上，依家仲有好多政治水可抽、有好多反中仇中牌可打，但對於得把口「與港人站在一起」嘅台灣蔡英文政府，點講都係「自己人、同路人」，無謂為咗5個人而得罪對方喇！
囍雨睇成件事，就係台灣「手足」由得你死，內地「手足」消費至死。呢班攬炒派，真「識計」！
請Follow我們的YouTube頻道：
下載我們的手機應用程式，收看第一手精彩內容：
評論