傳統攬炒派想延任嘅程度，大家睇佢哋近期不斷打「開口牌」就會感受到，而佢哋當中嘅功能組別議員，當然一樣想延任；最近，有新聞指教協就教育界議員葉建源去留收集會員意見，結果係多數會員支持葉建源留任，「不少教協會員」認為，教育界已經成為政權重點攻擊對象，感到好大「危機」，所以認為唔能夠輕易放棄議會陣地，一定要有人「守住」。而葉建源最終會否留任，就仲要考慮整體情況同其他因素。廣男就覺得，教協好、葉建源也好，其實已經為「留任」做好晒準備，如果情況未去到最差，例如再有民調顯示大多數支持者反對延任，呢個教育界議員，極可能會延任。
是教育界問題叢生
喺攬炒派包括教協在內嘅角度，教育界係不斷「受到攻擊」，但大家客觀啲睇件事，其實係教育界近年問題叢生。失德教師多、仇警教師多、有教師竄改歷史，甚至有教師違法，喺呢個背景下，並唔係教育界「受到攻擊」，而係教育界歪風不絕，社會要求糾正歪風嘅聲音強烈先啱。至於教協或者葉建源，恕廣男老實講句，佢哋根本就係失德教師嘅「保護傘」，與其話要守住議會，不如話係借用立法會議員身份，繼續包庇失德教師。
依家有傳媒報道教協收集意見係「多數會員」支持留任，廣男想問下，所謂多數，即係有幾多呢？係咪所有教協會員當中，超過一半表態支持葉建源留任？定係只係少部分會員比意見，當中支持葉留任嘅人佔多數？不如教協公開數字，等公眾判斷一下。廣男大膽估計，教協或者葉建源仲未作決定，其實只係睇緊風向，如果其他主流攬炒派議員留任，葉建源幾可肯定會留任；葉建源要離任，唯一或者最大可能性，就係其他攬炒派都「走人」，葉建源唔好意思「自己留低」啫！
守住薪津最重要？
攬炒派成日話要守住議會陣線，為攬炒派支持者「擋住」惡法，但廣男要講句，攬炒派喺議會佔少數，有議員成日唔開會，有議員「關鍵缺席」，甚至有議員自己提完議案自己缺席令議案「流產」，廣男真心想知道佢哋可以「守」住啲咩呢？唯一肯定佢哋可以「守」到嘅，就係自己嘅薪酬同辦事處開支津貼。大家可以問下葉建源，如果佢留守議會，佢實際會為教育界做啲咩？如果含糊地講「守住」議會陣地，其實咪即係乜都無講過囉！
圖片來源：RTHK、政府網頁
請Follow我們的YouTube頻道：
下載我們的手機應用程式，收看第一手精彩內容：
評論