攬炒派政客，佢哋嘅言行有時真係「雙重標準」到無底線，港警執法止黑暴，佢哋話係警暴；美國警察殺市民，佢哋當睇唔到。類似嘅「雙重標準」，同樣應用喺佢地對待「手足」事件上。之前「12瞞逃」畏罪潛逃想偷渡台灣喺內地水域被廣東海警截獲，攬炒派議員開記招、做街站甚至陪「瞞逃」家人去報案；但同樣係潛逃台灣，同樣係被扣查，攬炒派對五個被扣台灣嘅「手足」，竟然視而不見、置若罔聞，好似由得佢哋「死」咁。到底係被扣台灣嘅「手足」已經失去利用價值，定攬炒派對住台灣，連半句聲都唔敢出呢？
「閃避逃」的何俊仁、鄺俊宇
廣男之所以要寫呢單嘢，係因為民主黨立法會議員鄺俊宇同前主席何俊仁日前開咗個記者會，席間有記者問佢哋有冇關注被扣台灣嘅「手足」、會唔會譴責台灣當局同開記者會等等，說好了「會後答」記者嘅何俊仁，開完會之後同鄺俊宇玩「閃避逃」，連記者問題都唔敢正面回答，剩係話「一路關心」等等。喺呢度，大家真係要問下民主黨，係咪已經放棄咗喺台灣被扣嘅五名「手足」？
誠如廣男喺上文所講，民主黨以至其他攬炒派政客，根本就係「雙重標準」，為咗內地被扣嘅「手足」就做到盡，百般砌辭塑造被打壓嘅故事，仲打國際線，搵外國政客「幫口」向中方施壓，但其他被扣台灣嘅「手足」呢？佢哋嘅言行似乎係想當「無件事」。廣男就覺得，佢哋之所以咁做，除咗係怕得罪台灣當局外，台灣嘅民進黨政府，根本就係佢哋攬炒派「反中央」嘅「同路人」，「同路人」捉咗「手足」？由佢啦，「同路人」嚟㗎，唔通同台灣反面咩？咁係「政治不正確」！
不怕害了被扣內地的「手足」？
如果攬炒派怕鬧大被扣台灣「手足」呢單嘢，最終會令呢五位「手足」更麻煩，廣男其實係可以理解嘅；但相同道理，如果佢哋知鬧大事情無著數，點解對住12個被扣內地嘅「手足」，佢哋又要咁高調，下下都針對住內地部門呢？唔通佢哋唔怕令到事情咁僵？定還是，佢哋根本都無理過被扣內地嘅12個「手足」，而係由頭到尾都係諗住做政治騷，食飽人血饅頭？對於五個被扣台灣嘅「手足」，好抱歉，你哋已經成為攬炒派嘅棄卒喇，有冇後悔當初出嚟抗爭，最後做咗攬炒派「Condom」（避孕套）？
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論