攬炒派嘅最大特色，除咗係政棍多之外，就係佢哋陣營當中有唔少號稱智囊的「冷氣軍師」，佢哋唔會去衝、唔會去做炮灰，但就鍾意「指指點點」，教啲「同路人」點做嘢；最近，有朋友叫囍雨聽下一個由劉細良同新民主同盟范國威做嘅節目，囍雨一聽，原來又係向攬炒派政客「指點迷津」，不過諗諗下，就覺得唔對路，例如劉細良叫人搞聯合陣線、要「資源共享」，囍雨極度質疑，要主流攬炒派議員將議會資源分出嚟，民主黨、公民黨肯咩？唔好玩啦！
市民關注民主的「大好時機」？
對於劉細良呢個人，囍雨起初以為佢已經出走去咗加拿大，但據報佢日前已經返咗嚟香港，返得嚟香港，當然亦會繼續「指點江山」；囍雨聽返佢同范國威喺八月尾做嘅一個節目，劉細良喺節目表示依家係「大好時機」去傾，因為未試過啲人對民主關切程度好似今次咁（應該係講黑暴運動）；老實講，囍雨覺得劉細良根本就係喺度「自high」緊，某啲攬炒派人士，可以話依家係「好時機」、「好機會」去同政府砌，但事實係，攬炒派人士依家根本係自身難保，一萬人被捕、羅冠聰等年輕領袖「出走」、《生果報》老闆黎智英官司纏身等，呢個係傾民主運動去向嘅好時機，定係攬炒派大敗、走佬「好時機」呢？退一步講，就算黎智英等人「仲撐緊」，呢位人稱「大台」、「金主」嘅黎智英由頭到尾，都係撐民主黨等主流攬炒派咋喎！
至於聯合陣線、資源共享以至將議會資源帶落地區嘅問題，其實民主黨、公民黨咁「搏命」想保住個議席，就係因為議會資源嘛；劉細良建議「資源共享」，呢啲大黨會聽咩？成個黑暴運動嘅操作，就係主流攬炒派或者「大台」喺度「鼓勵」抗爭，然後激進派去衝去做「炮灰」，主流攬炒派再食盡「人血饅頭」贏議席、贏曝光，兩邊嘅人甚至可以話有利益衝突，要佢哋組成陣線、資源共享，呢個想法實在太過「樂觀」同「離地」。而呢個事實，唔係一句「唔好分化」就可以解決，事實係主流攬炒派一直「抽盡水」，已經惹嚟極多「同路人」不滿。
要做洗腦教育
最後，囍雨留意到劉細良喺節目話自己搵通識、歷史科教師合作，遲啲會做節目俾中學生睇，囍雨就喺度諗，劉細良係咪想玩「洗腦教育」，向學生散播仇恨？定係，呢個係佢吸課金嘅「新招式」？講真，攬炒派人士要搵食、要人課金，好正常，但如果想荼毒學生，就值得商榷喇！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論