囍雨今日睇到新聞，話說美國《時代》雜誌揀選本年度對世界最有影響力人物，依家喺讀者投票環節排第一位嘅，係已經畏罪潛逃英國嘅前香港眾志核心成員羅冠聰。至於參與投票嘅係啲咩人居多，囍雨唔知；最後由雜誌編輯揀定嘅名單會係咩結果，囍雨亦都冇興趣估，不過就喺度諗一個問題，如果一個連自己罪責都唔敢面對嘅逃犯，都可以成為「最有影響力」人物，呢個「時代」，係咪有啲悲哀呢？
囍雨留意到，得知自己「榜上提名」之後，羅冠聰喺自己Facebook一連發咗兩篇貼文高調回應。一篇就提到希望「香港早日光復，民主到來；政治犯全部與家人重聚，而流亡海外的能早日回港」云云；另一篇就以自己父輩嘅「逃難故事」，宣揚所謂「時代就這樣推著我們前行」、「我的父輩多是『經濟難民』，而這一代的全是『政治難民』」…對於呢種講法，囍雨絕對不敢苟同，其實無論羅冠聰依家講幾多「漂亮說話」，都無改佢嘅本質，由頭到尾都只係一個自私、虛偽嘅政客、逃犯！
靜雞雞走佬的政客
政治犯？政治難民？囍雨好想問下，其實羅冠聰一直以嚟做過啲乜、可以受此稱呼呢？不如大家換個角度諗下，如果一個政客，不斷勾結外國勢力、叫外國「制裁」自己國家及香港，然後仲要大言不慚話自己有幾咁「愛」呢個地方，你信唔信？依家香港可以話係水深火熱，疫情反復無常、經濟重啟仍未可期，黑暴勢力亦都未消退，喺咁嘅多重打擊之下，羅冠聰呢啲政客仲要日日周圍唱衰香港、踩多兩腳，反而自己靜雞雞話走就走咗去，有冇咁嘅「政治難民」？唔好講得自己咁偉大啦！
囍雨有時都好想知，其實香港對於羅冠聰之流而言，究竟算個咩地方呢？猶記得當初因為美國疫情嚴重，羅冠聰為咗避疫，第一時間話返就返；好喇，依家為咗逃避《港區國安法》、唔想承擔罪責，又話逃就逃，囍雨又想問下，你自己見勢不對就溜之大吉，咁當初俾你煽動出嚟「抗爭」、依家又走唔到果班「手足」，又可以點？羅冠聰當日「瀟灑地上機」時，有冇理過班「手足」死活？依家仲好意思喺外國獨享光環？！
背後有無金主？請羅冠聰回答！
話時話，羅冠聰勾結外國勢力咁耐、又潛逃咗咁耐，好似從來冇答過一個問題：究竟佢背後有冇金主、有冇外國勢力俾資金？不如趁住今次「有獎攞」之際，好好地回答下或者「答謝」下喇！講到呢度，囍雨又好想知，如果日後有香港「手足」過嚟英國投靠羅冠聰，羅冠聰會唔會幫手接收下，又或者幫佢哋搵下「金主」相助先？
唉！講到尾，又係果句「同人唔同命」，香港嘅「手足們」真係唔「恨」得咁多，要怪，只能怪自己唔係好似羅冠聰咁有外國勢力「射」住，連著草都「風光」過人。唔知香港果班被捕嘅逾萬名人士，尤其係其中四千幾個學生，如今睇住羅冠聰呢啲「一將功成」嘅政客，心裡面會係咩滋味呢…
原圖：羅冠聰fb
請Follow我們的YouTube頻道：
下載我們的手機應用程式，收看第一手精彩內容：
評論