教師失德問題無日無之，有社會人士要求教育局公開有失德教師及其所屬學校名單，不過教育局一直都唔願意咁做。據傳媒報道，教育局回覆傳媒查詢，稱局方完成180宗個案調查，其中63宗唔成立，至本年7月，向17名教師發出譴責、向9名教師發出書面警告；教育局發言人仲表示，佢哋分別向19名教師發出書面勸喻，並向15名教師作口頭提示。囍雨想問下，從數字計算係咪有117宗投訴成立？教育局譴責、警告等處理咗60宗，咁另外果57宗呢？用咩方式處理？教育局可唔可以再交代下？
嚴肅處理 但零取消註冊
如果大家留意下教育局向傳媒提供嘅數字，會發現有幾十宗投訴成立或者未知情況嘅教師涉嫌專業失當嘅投訴，其實大家唔知咩環境；到底係有罰，定係無罰？如果無罰，又係基於咩原因？更重要嘅係，喺投訴成立嘅個案當中，囍雨見唔到「有一宗」係要取消教師註冊，如果真係嚴肅處理，點解咁多失德教師依然可以保住教師嘅專業註冊？教師被裁定失德但可以繼續做老師，老實講，教育局嘅懲處，真係無乜阻嚇力。
另一個問題，就係教育局認為「公布有關學校的名稱將針對整間學校，對在同校任教並秉持專業操守的其他教師並不公平，亦對積極跟進，加強監察和指導的學校管理層不公平」，稱教師註冊嘅法例同其他專業人士嘅註冊條例唔同，「不能直接比較」，囍雨認為呢件事大家可以用常理去諗諗，如果其他專業人士例如醫生涉嫌失德、要接受聆訊或處分時會被公開姓名，咁點解教師又唔可以呢？
請讓家長有所防範
學校、教師嘅利益，社會一定要重視；但事情嘅另一面，就係公眾、家長以至學生嘅福祉。試想像一下，如果一間學校「充斥」問題教師或失德教師，而家長唔知道、無選擇，咁仔女喺學校會唔會被荼毒，會唔會被煽動成為暴徒、「衝衝子」？進一步去假設，如果仔女因為被煽動而犯上嚴重罪行例如觸犯《港區國安法》，咁仲有前途可言？
公開失德教師身份以至其學校名單，正正係為咗保護社會、家長同學生，教育局唔願意做，係避事！唔願意做仲藉口多多，咁香港嘅教育，仲有咩希望呢？
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論