民主黨立法會議員想延任一年，可以話係「司馬昭之心，路人皆見」，不過，佢哋就係都要「整色整水」，話要搞民調定去留，而坊間做嘅民調結果，就「完全忽略」，擺明係「反民主」。近日，民主黨嘅立法會議員林卓廷出席網台節目，就話「憂泛民總辭 建制清算『反送中』」，建制派會利用「特權法」徹查運動「資金來源」等，全面清算、「公審」參與「運動」港人云云。林卓廷講得「慷慨激昂」，但係佢講漏咗一樣嘢，如果議員延任一年，一個議員薪酬加辦事處開支等津貼，有成400萬港元。
枉為前執法人員
同其他攬炒派議員唔同，林卓廷非常喜歡強調自己係前廉署執法人員，先唔好講佢果時職位「低唔低」，作為一個前執法人員，囍雨想問下林卓廷，立法會或者執法部門去查黑暴運動嘅「資金來源」有咩問題呢？正常嚟講，如果啲錢係見得光，邊個查、點樣查都唔會有問題；林卓廷言下之意，係咪佢都覺得黑暴運動嘅資金來源可能有問題，所以唔可以俾立法會查呢？算唔算「鬼拍後尾枕」？
囍雨睇《生果報》報道，林卓廷不斷力陳攬炒派議員「延任」嘅「好處」，一時話擋住建制派用「特權法」查黑暴資金，一時又話如果容許港人喺大灣區投票會令攬炒派失去200個區議會議席。數目好似計得「好清晰」，但如果要計數，林卓廷做乜唔話俾人聽一個議員一年可以坐享至少400萬元資源？點解唔話俾人聽過廿個攬炒派議員加埋，條數係超過8,000萬元？點解又唔見佢講下，有啲黨友供緊過千萬元嘅豪宅，無咗「份工」好大獲？囍雨就覺得，其他人最睇唔過眼嘅，係一班政客為錢想「延任」，但又要扮正義，千方百計搵藉口，言行令人極嘔心！
從政者都要供樓
其實，政客都要食飯，政客都要供樓、交租，或者政客都要養家，要錢要資源係人之常情，囍雨見到即使最反政府嘅本土派或激進派人士，佢哋當中都有人講過，如果攬炒派議員直接承認需要錢、資源，咁會令人容易接受啲。依家諸如林卓廷嘅政客，喺度扮到自己「全為香港」咁，極度虛偽。近日，囍雨觀察到反對攬炒派議員延任嘅聲音越來越大，當中包括攬炒派嘅支持者，民主黨、公民黨等政客諗住借民調延任，最終會唔會「陰溝裡翻船」？大家真係買定花生，等睇好戲喇。
圖片來源：網上圖片、RTHK
請Follow我們的YouTube頻道：
下載我們的手機應用程式，收看第一手精彩內容：
評論