是去？是留？攬炒派立法會議員仲未有答案？咪傻啦，一班好緊張自己薪津嘅政客，其實心入面一早已經有答案，依家話要用民意調查定去留，根本只係「一場戲」；廣男今日睇新聞，又有一個民調結果顯示大部分受訪者認為攬炒派議員最好全部辭任。對於又有民調叫佢哋「執包袱」，攬炒派議員係咪又當係「參考」？講真，想留咪出聲囉，唔好搞咁多嘢啦！
超過七成受訪者認為攬炒派應辭任
話說公民社會研究所訪問咗2,500名18歲以上嘅選民，結果顯示，超過75%受訪者認為泛民議員最好全部辭任，而最應該辭任嘅政團，依次序為民主黨、人民力量、香港本土、公民黨同教協等等。簡單而言，受訪者希望攬炒派議員辭任嘅意見「頗為一致」，廣男真心想知道，民主黨等政客今次又有冇回應呢？
事實上，香港民意研究所之前亦已經做過兩次調查，一次支持佢哋留任嘅只有24%，另一次就只有35%，廣男睇唔同機構做嘅唔同民調，市民想攬炒派議員辭任嘅民意非常清晰，如果民主黨等主流攬炒派議員真心順應民意，其實唔駛等咩「再做民調」，而係立即宣布離任，佢哋依家好似「無限復活」咁另外做民調，似係想做到「滿意為止」咁，予人好強烈嘅輸打贏要觀感。
自訂超窄民調門檻
有朋友問廣男，民主黨等主流攬炒派再做民調，其實結果都係一樣，佢哋到底做嚟做咩？廣男就答果位朋友，大家都睇少咗主流攬炒派延任嘅決心，佢哋今次同民意研究所做民調，已經將個門檻設定到超級窄，只係計算自己「支持者」嘅意見，如果受訪者話自己係人民力量支持者、朱凱廸支持者，或者本土派支持者，都可能唔計算在內，如果只係計自己「支持者」意見都輸，咁佢哋都「無得怨」啦！只不過，廣男覺得奇怪，佢哋成日話自己代表民主派，依家收集意見只計自己嘅「支持者」，將其他民主派支持者「排除在外」，唔奇怪咩？
民主黨等攬炒派政客搞咁大壇大龍鳳，其實都係想留任啫，廣男建議，佢哋直接表態做決定算啦，依家將場政治騷做到爛晒，相信支持者都覺得佢哋肉酸囉！
請Follow我們的YouTube頻道：
下載我們的手機應用程式，收看第一手精彩內容：
評論