違法達義發起人戴耀廷終於被港大解僱，唔可以再喺港大教書，近日，佢接受《生果報》專訪，聲稱「當大學的靈魂──學術自由已死，離開港大便是尋找新生」，又指自己堅信香港「死得可復生」、「捱得過，新生就會係美好！」。《生果報》將訪問標題寫為《告別港大萬日教學生涯 戴耀廷推動法治重生》，囍雨質疑，戴耀廷一直以嚟都用力「謀殺法治」，佢依家話要推動「法治重生」，唔諷刺咩？

與學術自由無關

對於戴耀廷嘅一番偉論，囍雨必先要講句，戴耀廷被港大解僱，同學術自由完全無關，佢之所以俾港大解僱，囍雨認為當中有兩大因由，第一就係煽惑「違法佔領」罪成，即係佢已經係罪犯；第二，係佢身為大學嘅法律學者，竟然教人犯法，港大解僱佢都係合情合理，事件亦同學術自由無關係。

至於佢要令香港「復生」或者「法治重生」，囍雨就覺得相當諷刺。自2013年1月起，戴耀廷就「日以繼夜，夜以繼日」地叫人「佔領中環」，煽動違法達義，之後本港違法歪風盛起，先有2014年嘅違法佔領事件，繼有2016年嘅旺角暴動，歪風發展到極致，更發生去年開始、持續超過一年嘅黑暴運動。如果話香港「已死」或者「法治已死」，戴耀廷肯定係其中一個主要兇手，所以要「香港重生」呢句話出自佢口，係完全無說服力。

囍雨覺得，戴耀廷就如打開「潘朵拉盒子」嘅人，依家香港俾佢同其他政客搞到一團糟，如果佢尚有良知，最應該做嘅，就係收手，唔好再教人抗爭，亦唔應該再講咩違法達義；佢嘅「法治重生」計劃，如果係叫人繼續抗爭，話俾人聽「黎明將至」，咁好明顯係想繼續推人做炮灰。由黑暴運動開始至今，已經有近4,000名學生被捕，當中包括戴耀廷之前所屬嘅香港大學學生，戴耀廷對今日嘅局面，其實覺唔覺得自己有好大責任呢？

法治是不論誰犯法 都要承擔罪責

法律面前，人人平等，真正尊重法治，就唔會犯法，亦唔會犯完法想卸責；戴耀廷口中的法治，如果係政客犯完罪可以政治理由作為擋箭牌，對唔住，呢種法治觀，囍雨不敢苟同。戴耀廷自己犯法、推人犯法，希望佢嘅「未來計劃」，係唔會再叫人抗爭、違法達義；如果係，請佢先帶自己子女上戰場，唔好搞其他人！ 

圖片來源：中通社、RTHK

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk