加拿大菲沙研究所發表咗《世界經濟自由度2020年度報告》，香港再次被評為全球最自由嘅經濟體，整體評分為8.94分；自報告開始發布以來，香港一直位居全球第一，政府對報告表示歡迎，但對於香港法治可能受削弱嘅懷疑，政府發言人就指研究所以偏頗及選擇性嘅評論、無理據嘅推測，推論未來香港在法治方面評分將下降。廣男就覺得，香港法治完好無缺，包括「港區國安法」在內嘅法例，既唔會影響法治，亦唔會從而影響到香港嘅自由。
藏在報告的「陰霾」
驟眼睇，可能會覺得呢份報告係「唱好」香港，但廣男睇報告內容，發現其實唔完全係咁，廣男睇到嘅重點有三；第一係香港排第一，但報告內容只係反映到2018年嘅狀況；第二報告寫到明「中央干預」弱化法治；第三就係提到「港區國安法」，並意指「中央干預」或會影響香港未來評分。簡單嚟講，就係依家最高分，但下次報告反映到2019年等狀況，法治等方面評分好可能進一步下跌，仲有可能影響到香港排名。
對於經濟自由，廣男覺得香港喺呢方面一直受到世界肯定，報告評分亦充分顯示咗呢一點；不過，當報告將香港法治等情況形容到有「陰霾」籠罩咁，廣男就唔係好贊成。論《逃犯條例》修訂，修訂原意根本就唔係要將香港人「送中」，而且修訂已經撤回；論「港區國安法」，其實全球好多國家都有國安法，香港咁遲先由中央出手立法，明顯係已經遲咗，而且法例對港人自由、經商行動，並無負面影響。
港區國安法反令香港更穩定
廣男唔知道撰寫報告嘅人有冇充分了解到香港情況，自去年6月起，香港受黑暴運動所衝擊，市民苦不堪言，正正係因為「港區國安法」立法，令街頭暴力大量減少，亦令喺香港搞「港獨」、分離主義嘅「老中青」政客卻步；從實際效果而言，「港區國安法」係令香港營商環境更為穩定先真，試問又點會對香港法治等又負面影響？
對於香港問題，對於「港區國安法」，廣男只能夠說外國組織對香港以至中國有太多誤解；如果有國安法會影響法治，相信世上好多地方都已經「法治受損」喇！
圖片來源：菲沙研究所網頁
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論