《壹傳媒》創辦人黎智英等人早前被捕，壹傳媒股價就急升，引嚟唔少人懷疑係有人「造市」圖利；近日，警方經調查後，發現有人涉嫌利用社交軟件串謀，不斷買賣壹傳媒股票，有關交易更佔三日交投量嘅接近四分之一，當中更有人獲利超過2,500萬元，事件共有15人被捕，涉嫌罪行為串謀詐騙及處理犯罪得益罪（亦稱「洗黑錢」），當中包括消防員、無業游民同黑社會成員等。囍雨當日一早就懷疑，所謂壹傳媒嘅股市神話，會唔會只係造市神話？
恐怖的交投量
據報，呢15個被捕人士，共買賣超過13,000次壹傳媒股份，涉及近17億股，交易金額約15億元，佔該段時間整個市場嘅交投量接近四分之一，估計獲利約3,870萬元，其中獲利最多嘅人，淨收益更超過2,500萬元。一單傳媒高層被捕案件，竟然引發一宗疑似「洗黑錢」案件，真係令人吃驚。
對於有人涉嫌「造市」，有人認為啲人只係「買賣股票」，警方出手係有「政治目的」，囍雨就覺得，大家可以用常理去睇呢事；僅僅15個人，竟然喺短短幾日間交易過萬次，佔整個市場嘅交投量近四分之一，如果話無造市成分，或者當中完全無串謀，大家信唔信？呢件事最慘嘅係，有唔少人諗住借事件表達支持或投資《壹傳媒》，點知就成為咗「被宰的羊」，依家睇嚟，成件事更似係一個局，都咪話唔慘。
事情「未解決」
警方表明，佢哋仲有大量調查工作要做，包括追查資金來源、得益去向以至幕後有冇操控、有冇其他人涉案等等，唔會排除任何可能性。囍雨認為，呢件事仲有冇人涉案，未知；背後有冇人操控呢場「金融風波」，未知；甚至，有冇外國勢力牽涉在內，都係未知。所以，警方一定要繼續查落去，如果有人借刑事案件炒作、操控股市，令小市民蒙受損失，為保持香港股市嘅公正性，警方以至其他單位，都必須要嚴正執法。
噚日，據報《壹傳媒》股價又出現大波動，囍雨喺度奉勸大家，好多人已經因為壹傳媒股票「損手爛腳」，仲諗住借機入市圖利？真係要諗清諗楚呀！
請Follow我們的YouTube頻道：
下載我們的手機應用程式，收看第一手精彩內容：
評論