前排，有一個元朗區議員「豪情壯語」，話以一個星期為限，要同立法會議員何君堯鬥多Facebook Like，如果輸咗，佢會辭職、做「港豬」；一個星期後，佢真係輸咗，不過佢無辭職，被批評「走數」。廣男以為事情已經完結，原來係未完嘅，呢個曾揚言「輸咗就辭職」嘅元朗區議員伍健偉，最近接受媒體訪問，仲掉轉頭批評返其他人「抨擊」佢，叫人「反思」。講真，你輸咗唔找數，人哋話你走數，好合理啫！你掉返轉話人哋，有冇咁厚顏無恥呀？！
自開賭局 又自廢賭局
呢場由伍健偉自己製造出嚟嘅風波，最合理嘅結果，就係佢「找數」辭職，但佢唔辭職，都算啦；俾人鬧，咪硬食囉，依家仲要接受訪，否認自己係參與「賭博」，話行動係希望引起「反思」，仲叫「同路人」反思下點解下下都要抨擊人；講真，你自己輸咗唔認數，人哋唔抨擊你，唔通讚賞你咩！
廣男覺得，伍健偉如果唔係真係辭職，根本就唔應該攞自己個議席嚟賭，作為從政者，最重要嘅就係守承諾，呢一點佢明顯做唔到。講從政者另一重要特質，有承擔，佢明顯亦無。講第三樣特質，要識得認錯，佢唔單止唔認錯，仲要話返「路路人」轉頭，原來，攬炒派議員只係唔守承諾、無承擔、諉過於人嘅政客，大家真係要睇清睇楚先得。
老實講，廣男覺得伍健偉「走數」事件，某程度上都幾反映攬炒派嘅特質，就係有理無理，總知就係搞政治騷先行；伍健偉為咗「出風頭」，攞個議席嚟賭輸咗又唔認數，其他攬炒派區議員，一樣係「千奇百趣」，有啲講到明唔服務政見唔同嘅居民，有啲開會又唔講地區嘢，反而喺度講與地區問題無關嘅事，有啲就利用宣傳品煽動仇恨訊息。各區議會、區議員亂象頻生，廣男都想問一句，民政處、相關政府部門，其實有冇咩對策？唔係諗住等下屆區議會再算呀？
地區已無事？
喺攬炒派把持下嘅區議會，不論係喺區議會內外，都明顯已經變晒質，當區議會、區議員唔再係為地區服務而崇尚政治炒作，福祉受損嘅，一定係廣大市民。
原圖：伍健偉fb
請Follow我們的YouTube頻道：
下載我們的手機應用程式，收看第一手精彩內容：
評論