公民黨前立法會議員、浸會大學副教授陳家洛日前出席一個香港民研嘅記者會，批評特首林鄭月娥押後選舉係「一意孤行，迴避民情」，對於陳家洛看似又「活躍起來」，有社會人士表示關注，並引述陳家洛幾年前嘅言論「我時時在班上挑戰我的學生，問他們有無想過有天早上醒來， 五星紅旗升不起…要想像它（威權政府）倒下來」。廣男就喺度諗，點解一個大學副教授，可以叫人想像「五星紅旗升不起」呢？
陳家洛適合教書嗎？
對於陳家洛嘅類似言論，其實係唔止一次，佢自己寫文章，亦曾寫到「試想像某天一覺醒來，那象徵着中國共產政權的五星紅旗升不起來了，這個政權真的倒了」，對於呢種引導人去諗或者想像國家「倒台」嘅言論，廣男第一個問題，就係大家容許中國嘅香港特區嘅公立大學，容納呢種教授嗎？
「違法佔領」發起人戴耀廷因為自己犯法、教人犯法而被港大解僱，陳家洛無犯法，但一個公然喺大學課堂、媒體表達「想像國家倒台」嘅政客，點解仲可以喺大學教書？如果公立大學可以容納呢種學者，咁其他學者，係咪又可以用不同方式隱喻或者「煽動顛覆」？廣男就覺得，香港人嘅公帑，絕對唔應該用喺呢種「政客學者」身上。
黑暴問題 也是教育問題
近一年多時間，唔少人都認為黑暴運動爆發，同教育有好大關係，而大專、中學當中有唔少問題老師，更加係教育歪風嘅禍心，佢哋一直喺度醞釀緊反政府、反國家嘅風暴；大家「想像」下，陳家洛喺大學教人去諗「國家倒台」，戴耀廷就喺另一大學教人「違法達義」，仲有其他大家未必認識嘅大學教授或講師「聚沙成塔」，結果一個又一個大學生被洗腦，幾年過去，就發展出黑暴運動。如果繼續俾陳家洛呢類政客留喺大學，某程度上，就係容許政客以學者身份喺大學反政府甚至反中央。
唔少大學嘅管理風格，都係「大事化小，小事化無」，雖然陳家洛相關言論已經發表咗好幾年，但廣男似乎唔見浸大有處理過；喺呢度，廣男想問下浸大，有冇同陳家洛傾過相關問題，有冇警告過佢？依家《港區國安法》已經立法，係咪確保到陳家洛唔會喺校園「以身試法」？對於陳家洛呢種教授，浸大又係咪會一路僱用落去呢？
圖片來源：大公報、RTHK
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論