囍雨留意到，一向喺「泛民應否延任」問題上唔多出聲嘅民主派立法會議員涂謹申，今日突然以《留守議會 寸土必爭》為題喺報章發表文章。大家睇個標題，都已經感受到涂謹申留任嘅「決心」有幾大，而且仲要講到「民主派在議會戰線仍有很多可以做」；臨尾又話「作為民意代表，去或留應由香港人授權。所以，我們期望市民參考我們的理據和判斷，經深思熟慮後作決定」…睇落，係咪好似好「誠懇地」喺度拉緊票？咦，民主黨唔係話要做「全港性、科學的」民調咩，依家為乜事突然咁古怪？！

劇情再發展落去，囍雨終於開始明白啲嘢。原來，民主黨、公民黨今朝聯同立法會議員毛孟靜及張超雄，以及香港民意研究所總監鍾庭耀一齊出嚟交代民調安排。相信大家都好有興趣了解下，呢個「全港性」點科學法…

嗱，根據民主黨主席胡志偉嘅解釋，民調有幾個重點。第一，門檻由之前佢哋自己提出嘅支持者「三分之二」，調低至「二分一」；第二，只訪問所屬嘅支持者，換句話，如果你係建制派嘅支持者，你可以接受調查，但對唔住，你嘅意見唔會計落可以「影響去留」嘅數字入面；第三，如果最終去留兩種意見都唔過半數，就「再作政治判斷」。

「科學的」民調 「科學地」篩選

但囍雨可以話俾大家知，呢啲都未算精彩，呢份問卷會點問問題，先係重點：第一條：「你有多支持（參與今次計劃議員）留任一年」；第二條：「你有多支持（參與今次計劃議員）辭任」；至於第三條，大家留意，重點嚟喇——請確認你是否「民主黨、公民黨、毛孟靜或張超雄的支持者」。

囍雨理解，即係話，如果你係上述黨派或者議員嘅「忠粉」，咁你嘅意見就可以用嚟「影響去留」；如果唔係，咁sorry，最多係「參考意見」啫。但大家諗下，做得呢啲黨派或者政客嘅「忠粉」，果班「民意」會反映啲咩？係咪就係反映呢班政客嘅立場？囍雨就話，梗係反映政客想要達至嘅結果啦！

出盡口術 越搞越肉酸

唔怪得出席記者會嘅毛孟靜同張超雄紛紛打「開口牌」、「出口術」，表明不能放棄議會戰線，依家再睇番涂謹申嘅《留守議會 寸土必爭》，講到咁明，啲「忠粉」們識做喇！唉，民咩調、講咩「民意授權」啊，依家予人感覺，根本就唔係問你「支持我去定留」，而係直頭等於同大家講「我要留任、唔該你授權我」；唔係民調，而係「炮製民調」！

囍雨就喺度諗，依家距離民調開始仲有超過兩個星期（21/9開始），呢段日子裡面，呢份「圈粉」名單會唔會越嚟越長呢？其實，想延任啫，搞咁多嘢做咩啊？！想要議席、想要高薪厚祿，好似鄭松泰咁直接講咪算囉，依家搞到又要自降門檻、又要篩選受訪者，越搞越肉酸，何必呢？！民意？不嬲只係攬炒派嘅「裝飾」嚟啫…

圖片來源：RTHK

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk