呢個世界，有一種人叫「冷氣軍師」，「冷氣軍師」嘅特點係講出嚟嘅嘢好動聽，但如果聽佢講呢？咁就「死得」人喇！而喺香港，如果講到攬炒派「冷氣軍師」排行榜，廣男絕對覺得戴耀廷絕對係No.1；今日睇新聞，又見到戴耀廷有鴻文，今次係講建立「地區議政平台」，大意係要喺體制以外建立民間機制，廣男喺度諗，戴耀廷會唔會係俾「陷阱」自己人踩呢？如果聽佢講組成「民間平台」，又會唔會被認為係唔效忠特區以至擁護《基本法》？
有點顛覆味道
首先，廣男必須要講句，戴耀廷嘅建議，未必只係建立民間平台咁簡單，例如佢喺文章開頭，就表明「這抗爭方法，觸及面其實更深層，不只在表層阻止威權進逼侵蝕，更全面否定專制統治，並展示民間力量，而且能反證官方機制已喪失統治正當性」，當中否定專制統治，咩意思？反證官方機制已喪失正當性，又咩意思？如果話官方機制無正當性而自己搞嘅平台有正當性，會唔會有顛覆政權嘅味道呢？
至於佢其他建議，恕廣男講句，先唔理區議員或者所謂「民主派初選」勝出者會唔會參與，佢建議要延任嘅攬炒派立法會議員要喺資源上支持「地區議政平台」，甚至要延任議員向所屬議政平台「問責」，即係要啲攬炒派議員同其他人「分錢分權」，戴耀廷覺得行得通咩？戴耀廷不如試下叫民主黨林卓廷分啲人工俾初選勝出者，林卓廷可能會答戴耀廷，議員有被捕風險，要佢哋分享人工是「侮辱」呢！
更重要嘅一點，係呢個議政平台如果組成，講明現行體制或官方機制無正當性，咁樣「另起爐灶」，會唔會被視為唔擁護《基本法》、唔效忠特區呢？如果係現任立法會議員或者區議員聽咗戴耀廷「老點」，有冇可能變相係DQ自己？諗到呢一點，如果有攬炒派政客跟戴耀廷講嘅去做，可能真係俾戴耀廷累死。
信戴耀廷？
睇返戴耀廷嘅「往績」，例如搞違法佔領等等，好似無一次係成功收場；信佢呢個「冷氣軍師」嘅，亦未見過有咩好結果。今次佢搬出地區議政平台嘅概念，攬炒派政客唔知仲會唔會「中伏」呢？
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論