民意研究所早前做咗個民調，反對議員延任佔多數？參考嚟啫！上個禮拜又有新民調？唔係「結論性」嘅！為咗「決定」係咪要延任立法會議員，民主黨無視之前已經有結果嘅民調，堅持要自己再另外做民調作參考同決定。囍雨就覺得，不論係民意研究所前個星期或者上個星期公布嘅調查，其實結果已經好明顯，民主黨硬要做民調做到「天荒地老」咁款，點解唔直接啲講，「我要出糧，我要繼續做議員」呢？
曾表明不干預設計
民主黨代表噚日見記者，其立法會議員林卓廷表示，今個星期會收集「民主派」議員意見，「再與研究所商討民調設計及安排，有信心9月21日開展全港性抽樣民調」；如果囍雨無記錯，前排同樣係民主黨，同樣係林卓廷講過，「民主黨不會參與民調的問卷設計，絕不作任何干預」，如果係唔干預嘅話，點解依家又要同民意研究所傾民調設計？唔係全權交俾人負責咩？有咩好傾？更重要嘅係，係咪想夾計將個問卷設計、門檻設計到有利自己延任？
根據傳媒報道，民意研究所上星期公布嘅民調有54%受訪者支持民主派議員全部離開，支持佢哋留任嘅只有24%，絕對可以話係民意昭昭；再上一個星期由同一機構公布嘅民調，係47%受訪者反對議員延任，支持延任嘅得35%，如果剩係計民主派支持者，更有六成三反對議員延任。
咁多調查已經反映咗民意，點解民主黨以至其他攬炒派唔跟隨？唯一解釋，就係佢哋想延任，又怕會俾人鬧，所以就「另做民調」！用另一角度睇，如果以上民調結果係有利於攬炒派議員延任，「龍門任佢搬」嘅攬炒派，好可能已經話自己會順應民意，所以決定延任啦！
想延任 就說吧！
民主黨嘅用意，已經明顯到連唔理政治嘅人都睇到係咩事，如果今次民調都係要求攬炒派議員離任（例如過50%反對延任），咁民主黨點？再做民調？表示權衡過輕重，都係要留守議會？囍雨覺得，民主黨最錯嘅地方，唔係想延任，而係佢哋想延任又要扮「民主」，搞到自己依家兩邊不是人；其實，一早話決定延任，依家就唔駛「民調」冚「民調」，搞到外界都覺得佢哋喺度做戲「扯貓尾」啦！
圖片來源：文匯報
請Follow我們的YouTube頻道：
下載我們的手機應用程式，收看第一手精彩內容：
評論