關於政府推行嘅全民檢測（普及社區檢測計劃），呢排大家都聽咗唔同方面嘅意見，最令廣男「估唔到」嘅，係竟然有一班醫護界嘅專業人士話唔會參與，亦唔會鼓勵或推薦人參與，有啲嘅理由係「唔清楚」計劃，有啲甚至話自己「風險低」所以唔會參與。坦白講，廣男認為唱衰全民檢測計劃，對抗疫完全無幫助；全民檢測未必係最好嘅抗疫方法，但喺社區仲有隱形患者而大家都唔知喺邊嘅時候，全民檢測絕對可以幫助社會「降疫」，有重大作用。
唱衰、唱淡 無助抗疫
今次全民檢測計劃，社會各方嘅意見，廣男感覺就好似係一場政府建制同攬炒派嘅「對決」，平時反對或者質疑開政府嘅醫護界專業人士，繼續喺新議題上不斷質疑政府；對於種種嘅質疑，包括質疑計劃成效，廣男首先想問一句，就算成效未至於極度理想，到底係做好，定唔做好？如果做咗可以搵出隱形患者，阻截到部分傳播鏈，Why not？而且今次檢疫開支由中央承擔，出錢又出力，香港市民毋須成本可以為自己做檢測，除咗政治理由，仲有咩要反對？
近月睇新聞，在唔同日子嘅確診個案中，有四至五成都係源頭不明嘅個案，即係自疫情第三波爆發以來，香港一直都有隱形患者，無人能夠確定自己一定唔係患者，就算係平時做足防疫工夫嘅醫護人員，一樣唔例外；隱形患者唔會突然認為自己染疫，咁如果唔做全民檢測，又點搵呢啲人出嚟呢？
社會充斥「假陰性」人士
喺一個電台節目入面，廣男今日聽到關於「假陽性」、「假陰性」等問題，做全民檢測，的確係有可能出現以上兩種情況，如果係前者，醫護人員可以再檢查作出核實；如果係後者，「假陰性」人士可能就會成為「漏網之魚」。但廣男認為，如果唔做全民檢測，就會連搵出大部分隱形患者嘅機會都無，孰輕孰重，市民該可以判斷到。
最後，廣男必須要講句，越少人做全民檢測，效果就越低；相反，越多人做，效果就越好。依家香港嘅情況，就係要控制好疫情，繼而重啟經濟，請大家唔好在意啲政治炒作，回歸基本，做好防疫工作，既為自己同家人，亦係為社會。
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論