民主黨立法會議員林卓廷等13人涉及暴動被捕，另外林卓廷同佢黨友許智峯等人另涉及一宗企圖妨礙司法公正案件。對於有議員以至其他被捕，攬炒派用咗兩個字去回應，就係「濫捕」。囍雨對於呢種對警方嘅指控，只有一個問題想提出，就係白衣人涉嫌犯法，要拉；咁如果係黑衣人或者攬炒派議員有違法之嫌，係咪就唔駛拉呢？
有人涉違法 警察要執法
再有人因為涉嫌去年元朗7.21案件被捕，唔少人都覺得白衣人打人要拉，呢個囍雨絕對同意；但用另一角度睇，如果黑衣人都有罪嫌，又點處理呢？囍雨睇過部分關於7.21嘅網上影片，的確係有黑衣人對白衣人作出挑釁，以至有人向白衣人射水等等，如果警方做嘢係攞住同一把尺，相信唔會有白衣嘅拘捕，黑衣嘅就唔駛拉呢個道理。
至於有人喺舊年「光復屯門公園」事件中涉嫌喺他人唔同意下強逼、攞人手機及刪除資料嘅案件，囍雨認為道理都係一樣嘅，睇返新聞報道，一班人圍住一個男子，涉嫌威逼人攞部手機出嚟比佢哋睇同刪除資料，喺咁嘅情況，有冇犯法係值得商榷。黑衣人好，政客也好，對唔住，都無凌駕於法律嘅自由。
以上案件，係咪有罪，一來要警方繼續追查，二來就要法庭判斷，囍雨睇新聞、影片，以上兩件事都唔似係民主黨胡志偉所講嘅「到場調停事件」咁簡單，前者有人言出挑釁甚至有動作，後者亦有逼人交出手機再刪除資料之嫌；退一步講，與其不斷攻訐警方嘅拘捕同檢控行動，大家係咪應該諗下，被捕人士嘅行為，係咪完全無問題呢？
法庭定奪最公道
囍雨又係果句，如果有人係有違法嫌疑，警方都要做嘢，白衣人如是，黑衣人如是，政客都係一樣。警方若然係調查中搵到證據，最公道嘅做法，唔止係警方作出行動，更要將證據提交俾律政司，如果律政司決定檢控，咁由法庭去處理，最為公道。法理的，應歸法庭去處理；政治上嘅考慮，係另一回事。
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論