大家先諗下，如果一位飲食專家對於某間食肆或食品，話「我唔反對大家食，總之我唔會食」，你估，仲有幾多人會樂意幫襯？又如果，一個保險業者都話，「買唔買保險隨得你，總之我唔會買」，大家又認為，呢一行仲會唔會令人信服？廣男唔係想賣廣告，只係想大家明白，對於一個業內人士或者專業人士嚟講，好多嘢唔需要講到明，因為一個言行或者「以身作則」，看在小市民眼中，客觀上就足以起到「有辦你睇」嘅示範效果。

未了解清楚就「不參與、不協助」？

近期政府積極推谷全民病毒檢測計劃，無他，就係想盡量搵出隱形患者，截斷社區傳播鏈，所以越多人參與，大家越安全。但對於逢親有中央幫手、有內地參與嘅嘢，講真，廣男預咗有「逢中必反」嘅政客出嚟搗亂，但估唔到嘅，係連醫界都有人「以身作則」唱反調。噚日，有本身係研究傳染病嘅專家話，因為「唔懷疑自己係隱形患者，所以唔會參與檢測」；今日，又有公共醫療醫生協會會長馬仲儀話，因為對檢測計劃嘅安排詳情「唔了解、有保留」，所以自己唔會參與、亦都唔會協助。

廣男好想問下馬醫生，既然唔了解檢測安排，咁點解唔去了解下？未了解就話「本人不會參與，亦不會協助」，係對自己嘅專業負責、對市民健康負責嘅表現咩？！廣男真係諗極都諗唔明，明明一個冇任何政治考慮，單純為防疫好、為市民好嘅病毒檢測計劃，點解連部分專家、醫生都立定心腸不鼓勵甚或要阻止市民參與？或者特首林鄭喺呢件事上講得啱，係有人連防疫抗疫都要政治化，唯一嘅目的，就係要搵一件事去抹黑中央，去破壞特區與中央嘅關係！

連醫生都要拖防疫後腿？！

睇番馬仲儀嘅講法，佢話自己作為醫生，如果要向病人推薦一樣嘢，「必需很清楚對病人有幫助及風險低」，又話如果佢自己有病徵或者屬於高危群組，就會去驗。廣男絕對唔同意呢啲冠冕堂皇嘅歪理！大家諗下，如果由得隱形患者存在於社區，成個香港、所有市民要承受嘅風險係咪仲大？時間仲長？而且，如果個個等到自己「有病徵」先去驗，會唔會太遲呢？作為醫生或者醫生代表，對於唔了解唔清楚嘅嘢，就應該去了解清楚！而唔係以「幫倒忙」嘅態度去拖住防疫後腿，咁做，叫「對病人有幫助及風險低」咩？！

好多地方嘅抗疫經驗話俾我哋知，疫情爆發之後就算有回落，唔等於唔會再復發；最好嘅應對方法之一，就係人人檢測！無事買安心、有事盡快醫。講真，疫情爆發到依家，香港都「自由」過好多地方，自由到即使面對世紀疫症，都冇好似其他地方咁實施強制病毒檢測，但如果，「自由」嘅同時，缺少咗自律、以及對人對己負責嘅態度，會係咩後果？大家真係要好好諗下！

原圖：rthk

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk