以前，囍雨認為民意調查係幫助社會人士了解民意嘅一個渠道，如果要就某議題了解市民諗法，民調係不二之選。不過，自從民主黨因為議員延任問題一時質疑民調、一時唔理民調、一時又話要做民調嘅時候，囍雨就質疑，原來民調係政客用嚟做政治決定嘅工具。噚日，民主黨再就進行民調以決定立法會議員去留問題見記者，被前黨友稱為「人格卑劣、毫無政治道德」嘅林卓廷，竟然話香港意研究所嘅上一個民調係「參考性結果，並非結論性」，佢非常尊重，「會參考在心中」。參考放在心中？咁今次再做民調，會唔會最後又變成參考，繼而捨棄呢？
奸狡的民調
對於民主黨唔理民調意見，而另外又找同一機構「做民調」，囍雨必先要講句，民主黨喺設定門檻方面係好蠱惑嘅。噚日佢哋嘅黨主席胡志偉見記者，表示民調會採取「雙門檻」，即係剔除「無意見」者之後，如果整體受訪者過半數有同一傾向，或超過三分二嘅「民主派支持者」有同一傾向，民主派就應該跟從民調結果。呢兩個門檻，正正就係民意研究所上次民調僅僅達唔到嘅門檻，民主黨咁樣「設定門檻」，係咪有「古怪」呢？
如果有留意到民主黨嘅講法，佢哋仲表明如果嚟緊民調達唔到門檻，佢哋係會交代去留；換句話說，即係如果兩個門檻都達唔到，到時佢哋就可以自訂去留，呢種先睇住上個民調嚟設定門檻，再話如果門檻唔達「再算」嘅講法，點睇都似係為延任鋪路！
更值得懷疑嘅一點，就係如果民主黨以至其他攬炒派唔滿意個民調，會唔會一個「屈尾十」，又話呢個民調係一個好好嘅「參考」，但唔係結論，然後就以要守住議會、擋住「惡法」為由，宣布留任？老實講，民主黨以至其他攬炒派嘅想法，可謂係「司馬昭之心，路人皆見」，想留任，其實最簡單嘅方法就係直接表態，依家搞咁多大龍鳳，set埋啲咁嘅門檻為預設結果「鋪路」，有必要咩？唔醜陋咩？
看看民主黨說什麼
執筆之時，囍雨喺Facebook見到一個有其立法會議員許智峯特寫照片嘅發帖，上面寫住「香港將會淪陷得好快好快，我哋喺議會，有啲嘢不能阻止，但亦希望可以減慢呢種淪陷」，囍雨都係果句，想延任，想保住每年每個議員400萬元薪津，坦白啲，出聲啦！唔好再懶係收集民意喇！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論