攬炒派立法會議員為咗可以「順利延任」，呢排似乎都「各自好努力」。可能係為咗一份「拎得見人」嘅民意授權，民主黨同公民黨上個星期已經話，會做一個「全港性、科學的」民調嚟決定去留，但明明上星期五，香港民意研究所就有一份「民意」擺在眼前（反對攬炒派延任佔多），佢哋又好似當睇唔到咁；由功能組別晉身立法會嘅會計界議員梁繼昌「仲醒」，早於民研嘅調查，已經率先幫自己做咗個「業界民調」，仲話結果顯示支持佢延任者「略壓倒反對者」，佢會「視之為重要參考」…呢份留任嘅「決心」，你話幾大呢！
回覆率極低的「業界民調」
但廣男又係果個問題：梁繼昌呢份所謂「民調」，究竟點得嚟呢？如果媒體報道屬實嘅話，梁繼昌應該係上星期一（17/8），以電郵發送問卷嘅形式，「咨詢」咗9,492名會計師，兩日後（19/8）嘅下晝6點，共有1,530人完成問卷，其中1,329人係選民。總括嚟講，受訪選民認同梁繼昌延任嘅大約佔52%，即係約696人；而反對就佔大約42%。大家認為，梁繼昌呢份「民意結果」，有冇說服力？有冇參考價值呢？
嗱，份問卷問咗咩問題，大家唔知；問題由邊個設計，大家唔知；果九千幾人係咩人，大家都係唔知。呢啲都先唔講住，單單係九千幾個人裡面，得千三選民回覆，廣男想講，回覆率咁低，又唔係隨機抽樣，咁如果套用民主黨嘅標準，好唔「科學」 喎！梁繼昌係咪見到「支持略壓倒反對」，就即刻攞嚟用呀？廣男就話，大家應該問下佢，既然身為「專業人士」，梁繼昌會唔會做番個「科學性」嘅民意調查先？！
其他功能界別議員 會做民調嗎？
至於其他功能界別嘅立法會議員，唔知係咪見到已經出爐嘅民調「有啲唔妥」，似乎都唔想「跟車太貼」。例如社福界嘅邵家臻就話「正諮詢業界同工及選民意見」，但因為「受資源所限」未必會做正式民調；教育界嘅葉建源就話「可考慮，但未有任何計劃」；醫學界陳沛然仲話「正專心抗疫，未決定會否做民調」（依家終於「專心抗疫」？）等等…佢哋係咪諗緊，依家咁嘅「風頭火勢」，一動不如一靜呢？明嘅明嘅，萬一做完個民調，結果「不似預期」或者相當不利，都唔知點算好！不如睇定啲先…
所以廣男喺攬炒派身上，都學識一樣嘢，就係民主又好、民意又好，除咗可以用嚟包裝成政治口號之外，點運用？幾時用？都真係好講「技巧」。日後如果大家見到攬炒派齊齊留任，絕對唔需要驚訝，因為佢哋「玩政治」，就係要玩到咁嘅結果，但到時大家一定要記得質問番佢哋，當初連民調都冇做果班議員，咁叫民主咩？佢哋當初係咁批評同反對政府押後立法會選舉，自己依家又「仆到去」延任？民主派「喎」！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論