經濟差，個個都想保就業，有啲人辛辛苦苦保住自己份工，點知遇著有人「打劫」，而打劫者又表示自己係「攞返自己應得嘅」，咁到底係邊個啱呢？呢種情況，似乎出現咗喺攬炒派身上，當一班主留攬炒派議員想留任但又「扭扭擰擰」之際，抗爭派已經出手，話現任議員當中有初選落敗者，所以就算佢哋延任，都應該將資源交俾初選勝出者，而且應該完全聽從初選勝出者嘅意見。依家嘅情況，有啲似攬炒派議員想「保就業」，而抗爭派就以民意之名「打劫」，囍雨真係想知，攬炒派議員點接招呢？
劉頴匡創新猶
提出初選落敗嘅現任議員要俾錢、俾權初選勝出者嘅，就係「民主派初選」嘅其中一位勝出者劉頴匡，佢稱呢個做法為「影武者」，簡單嚟講，就係現任議員成為「影子」，真正話事人係初選勝出者先真；劉頴匡仲提出咗三個例子，包括李國麟、梁耀忠同黃碧雲，都應該做初選勝出者嘅「影子」。聽完劉頴匡呢番見解，囍雨真係覺得好「奇妙」，咁都俾劉頴匡「諗到」！
首先，囍雨要講句，囍雨講攬炒派議員似「被打劫」，只係一個「類比」，因為論民意，初選勝出者的確係攬炒派陣營嘅「眾望所歸」，初選落敗嘅現任立法會議員嘅資源應該歸初選勝出者，都唔係無道理，只係喺初選落敗嘅現任議員，實有一種有人「想打劫」嘅感覺，依家抗爭派以民主之名向主留攬炒派「挑機」，實在有趣。
攬炒派議員的「兩難」
現時情況，對攬炒派現任議員、尤其係輸咗初選嘅議員而言，可謂非常尷尬，如果聽抗爭派講，咪未來一年都成為初選勝出者嘅「扯線公仔」；如果唔聽，又俾人話佢哋唔理民意。可能對於現任攬炒派議員而言，搞公投、民調，借民調結果做藉口去「合理化」自己延任，可能係「唯一出路」。
講開議席同錢，囍雨覺得抗爭派可能未夠了解攬炒派議員，之前疫情嚴峻，外界叫攬炒派議員捐一個月人工出嚟，班議員都好似「俾刀割」咁款；依家係講緊一年120萬元人工同埋270萬元辦事處津貼，想攬炒派議員放棄？叫佢哋放棄民主可能仲容易啲！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論