喺廣男仲係一個中學生嘅時候，校園有一個恆久嘅課題，就係「中學生應否談戀愛」，去到2020年嘅今日，講中學係咪可以拍拖，可能已經「不合時宜」，依家最流行嘅討論，係中學、中學課堂係咪可以討論「公民抗命」；對於呢個所謂課題，廣男只係想問一句，關乎違法嘅嘢，點解可以喺校園討論？但係，教協似乎有唔同睇法，佢仲對有通識科教科書俾教育局睇過之後刪去「公民抗命」等內容「非常不滿」，甚至稱教育局係政治審查。廣男就覺得，與其話教育局政治審查，不如話有人刻意將政治、違法議題帶入校園，而教協就作為「保護傘」，則肯定有助長教育界歪風！
違法事情 真可討論？
對於教協嘅新聞稿或聲明，廣男唔喺度逐重述，但佢稱教育局政治審查，廣男絕對唔同意。第一，所謂公民抗命，喺香港攬炒派推動、包裝下，即係違法達義，說穿了，就係教年輕人犯法，過去一年嘅黑暴運動，咁多年輕人犯法同入獄，已經係最明顯嘅「違法達義」例子；廣男唔明白，喺呢個越嚟越多年輕人犯法嘅前提底下，點解仲要喺教科書討論公民抗命或者違法達義呢？
過去一年嘅黑暴運動，暴徒（包括年輕人、學生）四處打砸搶燒，最嚴重嘅例子，就係有暴徒用磚頭掟死老人，同埋有暴徒火燒市民、令人一度危殆到依家都未康復，呢啲例子，算唔算違法達義？經過一年嘅黑暴運動，以自由、正義之名作惡、施行暴力嘅事件不斷，仲要容許通識科講公民抗命、違法達義？唔好玩啦教協！
教協是暴力保護傘
老實講，廣男已經唔會認為教協係教師組織，佢哋「演變」到今日，已經係一個政治組織，甚至可以話係政客、違法者嘅「保護傘」；調番轉咁講，如果教協真係為學生好，佢哋敢唔敢譴責黑暴運動？敢唔敢向公民抗命或者違法達義「說不」？廣男必須講句，過去一年咁多學生被捕，教協都係幫兇！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論