喺近排紛擾不斷嘅政治新聞之外，廣男睇到一則關於黃店勞資醜聞嘅報道，茶餘飯後，倒也值得一論。話說某間「小館」被同係黃絲陣營嘅「勞工組」專頁篤灰刻薄員工，明明係解僱了，就夾硬當「自動辭職」來辦，以此拒絕支付7日嘅代通知金；仲要被踢爆都唔認數，直到「勞工組」上載錄音為證，涉事小館先至死死氣「跪低」。廣男睇完第一反應，黃店唔係成日標榜自己「良心」咩？笑話嚟㗎？
其實大家如果睇番篇報道，可以睇到更多細節，例如個員工已經向總經理澄清自己唔係辭職，但個老闆就堅持係「辭職」；果段錄音仲顯示，交涉過程中有一把女聲要求對方解釋自己被炒嘅原因，另一把男聲就答「因為上面想你即刻走」…大家點睇？如果問廣男，講真，如果報道屬實嘅話，其實一個最基本嘅原則，無論生意做成點，又或者經濟幾不景、幾想「慳成本」都好，點解要刻薄員工先？更重要一點，點解要講大話先？又係啲黃店成日話自己「為香港人」、「幫自己人」…就係咁？！
炒人當「辭職」
遠嘅唔講，單單係過去呢一年半載，大家眼見都唔少黃店標榜自己係「有良心」不得止，仲經常見到佢哋指摘政見唔同嘅人士、僱主「無良心」，今次發生呢件事，就令廣男睇清一樣嘢，黃店、黃營，其實唔一定「有良心」。作為僱主，炒人可以，你有咁嘅權力同自由，但炒人仲要話人哋係「辭職」，仲要拒絕賠償，就真係好過分！有冇顧及過打工仔亦都搵食艱難？廣男就話，「良心」呢個label，可以休矣。
廣男仲留意到一樣嘢，就係事件爆出之後，一眾黃絲即刻割席，有啲鬧涉事「小館」偽善、有啲又話要「退訂食品」，仲有自稱前員工嘅人士話「做過XX就知果度根本係地獄」…廣男就喺度諗，以攬炒派嘅作風，相信類似嘅「極速割席」仲會陸續有嚟，再諗落去，呢間「小館」都恐怕難以「立足」。
如此時勢 還分「黃藍」？
講到呢度，廣男其實有啲唏噓，以香港依家咁嘅時勢，仲要分「黃藍」？疫情幾時完？未知；經濟幾時復甦？未知！執筆之時，政府數字顯示，香港嘅失業大軍升至24.25萬人（4-6月為24.07萬人），再咁惡性循環落去，未來日子「有生意做」都偷笑啦！呢啲時候仲要分清邊個黃、邊個藍，會唔會太outdated、太不合時宜啊！其實，「良心」，唔係靠「顏色」去體現；面對逆境，齊心合力先係良知！
原圖：大公
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論