呢幾日，社會都喺度討論《生果報》老闆黎智英被捕一事，外界焦點都集中喺黎智英以至周庭等人身上；不過，有社會人士指出，原來「蘋果日報慈善基金」都非常值得留意。據報，警方喺《生果報》大樓檢走包括「蘋果日報慈善基金」嘅文件，而《生果報》就表示文件涉及新聞材料，決定申請臨時禁制令；有人指出「蘋果日報慈善基金」喺2017/18同2018/19兩個財政年度，都有捐款未詳細交代去向，好多人都想呢個基金更透明、公布更多捐款細節。
九成捐款去咗邊？
根據喺網上披露嘅財務報告一啲部分，「蘋果日報慈善基金」喺2017/18年度支持社會服務項目、獎學金申請者嘅款項，大約為267萬元，但該年度捐出款項為3,676萬元，其餘嘅九成款項，捐去邊？同樣，喺2018/19年度，用喺支持社會服務項目同獎學金申請者嘅款項約為461萬元，但該年度捐出總額高達4,500萬元，又係得一成左右，其餘九成捐款，又係捐去邊呢？
根據早前嘅《明報》報道，報道指「消息稱，曾有蘋果日報記者協助涉參與去年反修例示威的人申請基金並獲批，部分人現已離港」，睇到呢度，廣男就有一個疑問，就係不論係2017/18、2018/19年度定係其他任何財政年度，其實「蘋果日報慈善基金」，有冇將捐款用喺政治用途？例如支持社會運動或者社運人士？點解無端端會有傳媒引述消息，話《生果報》有記者幫過黑暴運動人士申請「基金」仲要獲批？對於上述疑問，「蘋果日報慈善基金」都係清楚交代一下好啲！
保護新聞材料？
根據《生果報》自己嘅報道，喺佢哋俾警方檢走「蘋果日報慈善基金」嘅文件後，因為「當中涉及新聞材料，因此決定申請臨時禁制令」，到底《生果報》要保護嘅真係新聞材料，定係仲有其他「材料」要保護？廣男相信，隨住警方一路查落去，公眾就會知道更多，廣男最想知，「蘋果日報慈善基金」，真係有批錢俾黑暴人士？
圖片來源：RTHK、蘋果慈善基金社交網頁
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
瀏覽我們的IG：https://www.instagram.com/speakout_hk/?hl=zh-hk