講起戴耀廷，唔同人對佢有唔同嘅「觀感」，有啲人認為佢係十惡不赦嘅「違法達義」始作俑者，有啲人就覺得佢係想操控選舉嘅「冷氣軍師」，咁戴耀廷點睇自己呢？原來，佢覺得自己係一個「天真的人，保持單純的心」。近日，戴耀廷接受訪問嘅時候，就話自己離開港大「感到更自由」，仲話已經開展「法治重生」計劃。睇到呢度，囍雨首先要問一句，乜法治有死咩？定係由頭到尾，只係戴耀廷之流想謀殺法治？
被解僱與學術自由無關
關於戴耀廷被港大解僱一事，戴耀廷受訪時聲稱「本地最高學府，守不住學術自由」，囍雨必先要指出，戴耀廷被解僱，同學術自由完全沾不上邊，佢嘅「罪狀」，包括自己犯法同埋教人犯法，關學術自由咩事呢？一個大學教師，有違法嘅自由？又或者，一個教法律嘅大學副教授，竟然教人犯法，當中無專業道德問題？唔係任何嘢都可以同自由拉上關係，尤其係戴耀廷被港大解僱一事。
至於戴耀廷話要開展所謂「法治重生」計劃，囍雨又要講句，法治「無死過」，唔需要咩「重生」，呢度有啲概念，大家一定要搞清楚，由2013年戴耀廷煽動「違法佔領」開始，一直想打擊法治嘅，係攬炒派政客、戴耀廷等人，幸好法治到今日依然健全；戴耀廷以至攬炒派經常強調「法治已死」，咁係因為香港司法系統唔容許政客以政治之名犯法。所以，與其話法治已死，不如話有一班犯法嘅政客喺度抹黑法治。
天真的人 單純的心？
最後，對於戴耀廷話自己會繼續做個「天真的人，保持單純的心」，囍雨想講，戴耀廷真係一啲都唔「天真、單純」，佢一直意欲做嘅，唔係要民主咁簡單，而係想透過攬炒議會去脅逼政府，甚至想借外國勢力撼動政權，實踐其「真攬炒十步」的奪權圖謀。呢一種「機心」，唔係為香港好，而似係想香港死多啲。囍雨喺度諗，戴耀廷嘅「法治重生」計劃，會唔會又係一個大規模嘅「違法達義」計劃？如果係嘅話，大家一定要睇實戴耀廷嘅所作所為，如果佢又教人犯法，甚至係教人去「反中央、反港府」，一定唔可以放過佢；總結過去幾年，香港之所以咁亂，一切一切，皆因戴耀廷而起，關於呢一點，大家一定唔可以忘記。
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論