對於攬炒派會唔會總辭嘅問題，囍雨一早已經講過，橫睇掂睇，佢哋都係唔想辭，激進抗爭派逼宮想佢哋辭，係一回事；但做緊議員嘅攬炒派政客，凡事「先向錢看」，則係一個現實問題。噚日全國人大常委會宣布全體議員繼續履職「不少於一年」，包括被DQ嘅議員，都可以做多年；事件吊詭嘅地方在於，攬炒派議員講明做法與《基本法》相違，但竟然唔總辭，而係話「會從不同渠道了解民意，詳細研究後再決定下一步行動」，即係想點？拖完一輪，然後扮無奈接受延任？
不斷攻訐 卻又戀棧權位？
囍雨上網睇咗所謂嘅「民主派聯合聲明」，簡單嚟講，佢哋嘅指控包括「港府自製的憲制漏洞下無中生有」、「人大決定是毫無必要，架空了兩制下的特區憲制」、「與《基本法》第69條『每屆任期四年』的規定相違」、「第五年的議會也不復有民意授權」等等，但講咗咁多嘢，係咪要總辭呢？原來唔係，佢哋喺結尾只係一句「民主派會從不同渠道了解民意，詳細研究後再決定下一步行動」，即係唔辭職、睇定啲先！
從以上聲明可見，攬炒派議員對押後選舉、俾現任議員「延任」有相當大嘅反對意見，囍雨唔明白，既然咁唔滿意政府延任安排，咁委屈佢哋，點解佢哋唔總辭呢？要表達不滿意見，就係唔好參與未來一年嘅立法會工作，甚至即刻辭職，點解攬炒派仲要「研究」下先？
有分析就指出，攬炒派呢個聲明，簡單啲嚟講，就係拖字訣，依家不斷話傾下先、諗下先，最可能嘅結果，就係拖下拖下，攬炒派就話自己為咗「保住關鍵否決權」、「喺議會監察政府」及「寸土必爭」等等，然後繼續做「中華人民共和國香港特別行政區立法會議員」，呢個預測，大家信唔信？囍雨就覺得好有可能發生！
黎智英歸位 攬炒派歸邊
攬炒派金主、大台兼黨鞭黎智英啱啱成功保釋外出，金主歸位，攬炒派會唔會好快得到指示，然後得到共識，要「忍辱負重」，繼續做議員？按攬炒派嘅「個性」，會！按攬炒派實況，例如有人將失業，有人要供豪宅，更加會「留任」！如果覺得囍雨有講錯，唔緊要，攬炒派大可總辭俾全港市民睇，以示決心！
請Follow我們的YouTube頻道：
下載我們的手機應用程式，收看第一手精彩內容：
評論