有人話，女人係世界上最難捉摸嘅動物，因為一啲好講emotion嘅女性一時一樣，令人覺得無所適從；今日，囍雨睇新聞見到《生果報》一篇由盧峯撰寫、題為《寸土必爭更能對抗威權政府》嘅文章，大意係話攬炒派議員留喺議會比總辭「可取」，囍雨睇完即刻有個大疑問，就係《生果報》到底想點？之前登出填詞人林夕嘅文章呼籲攬炒派議員「轟烈宣布全體辭職，立刻即時趕快」，依家社評又話要「寸土必爭」，咁即係想人總辭，定想人留低呢？
泛民總辭 市民叫好？
其實對於總辭問題，《生果報》老闆黎智英都作出過類似林夕叫人總辭嘅呼籲，依家盧峯又想叫人「留在議會」，到底《生果報》係想人辭，定唔想辭，囍雨真係分辨唔到。不過，囍雨綜觀近日唔同嘅新聞，其實坊間包括攬炒派支持者，似乎都係想攬炒派總辭多啲，依家攬炒派議員「唔表態」，《生果報》又好似轉軚，唯一解釋，就係攬炒派內部分裂，根本未傾掂數。
囍雨就覺得，攬炒派「舉旗不定」，絕對有「足夠理由」，依家叫總辭果班人，一係就已經搵夠錢上岸，一係就本身唔係在任嘅立法會議員，佢哋以抗爭心態去表明立場，梗係想攬炒派總辭啦！不過，現任攬炒派議員作為「圈內的羊」，離任或者總辭，即係變咗「無人供養」，心底裡當然唔想辭，只係為怕得罪抗爭派，所以先擺出一副「傾下先」、「度下先」嘅姿態。
講到底，呢個就係錢嘅問題，萬一攬炒派議員總辭，佢哋即刻就無咗本來享有、大約有70萬元嘅約滿酬金，計埋如果被委任做多一年，人工唔見約120萬元，亦唔會有約270萬元嘅辦事處開支津貼；即係話，佢哋如果為咗「型一下」而總辭，起碼損失超過四百萬元。抗爭派想攬炒派議員辭職，有冇理過人哋個「銀包」有咩感受呀？
無人供養 如何是好？
喺依家嘅政治以至國際環境下，攬炒派議員唔做議員，要喺出面另謀出路或者「水路」隨時已經閂水喉，做立法會議員可以話係佢哋嘅「最佳筍工」；以民主黨立法會議員鄺俊宇為例，佢啱啱先「上車」買咗千萬元豪宅，會唔會咁容易就放棄議席？恐怕唔會囉，真係「口裡說不，銀包最誠實」！所以叫人總辭嘅人，應該先認清班攬炒派議員嘅真面目。
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論