今日清早，手機上已經傳嚟壹傳媒老闆黎智英被警方上門拘捕嘅消息；隨著新聞不斷滾動緊貼事件最新發展，廣男嘅朋友圈裡面亦都一片熱議，大家都想表達嘅一個共通點，就係天網恢恢、疏而不漏！廣男亦都有同感，公義，有時或者會遲到，但從來唔會缺席。黎智英被捕，正正證明一點，就係無論你係咩人，有幾大權勢地位、背後有咩勢力撐腰，只要涉嫌犯法，一樣要拉。
警方搜查避開採編部門
據聞黎智英今次被捕，罪名包括涉嫌違反《港區國安法》中「勾結外國或者境外勢力危害國家安全罪」，以及串謀欺詐及煽動罪；但無論呢啲罪名日後點審點判，廣男喺度想特別請大家留意一點，就係警方執法行動，與「新聞自由」無關！
黎智英被拘捕之後，廣男見到民主黨、記協等人即刻跳出嚟，一時話拘捕「傳媒人士」、大舉搜查傳媒辦公室，令到「新聞和言論自由危在旦夕」；一時話「有如在第三世界打壓傳媒」、「白色恐怖」云云…的確，警方近二百警力今日係有進入壹傳媒大樓進行蒐證、調查，但警方國安處高級警司李桂華已經講得好清楚，調查行動會「避免到有新聞材料嘅部門，例如編採、記者等」，警方亦都會審視邊啲部門唔搜得。廣男想講，唔該攬炒派唔好又喺度乘機挑撥事端、販賣恐懼，黎智英依家涉嫌嘅罪名，關「做新聞」咩事？新聞自由，唔通包括分裂國家、煽動、或者欺詐？！而且犯法就係犯法，新聞自由唔係擋箭牌，香港亦都冇法外之地！
黎智英勾結外力 有行動有「效果」
對於黎智英涉及嘅具體案情係點，廣男依家梗係唔知啦，之但係如果大家睇番佢過去諸多言行，基本上都睇到一個明顯嘅事實，就係此人不嬲都同外國勢力「交情深」。隨舉幾例，例如黎智英曾經講過要「為美國而戰」，講過「很想CIA，很想美國影響我們」、又喺報紙登頭版宣揚「一人一信」叫特朗普「救香港」；舊年反修例運動爆發之後，黎智英又先後兩度去美國「見主子」，包括美國副總統彭斯、國務卿蓬佩奧、國會眾議長佩洛西等人，一再「爭取」美國國會通過用於「制裁香港」嘅所謂「香港人權與民主法案」等等。
尤其甚者，即使《港區國安法》實施之後，黎智英都冇收斂過，仲多次喺佢Twitter平台直播「唱衰」香港、國家，包括宣稱「若要堅持抗爭，就需要將戰場轉移至立法會內」、「香港若持續遭到中國破壞，只會顯示國安法的錯誤，並且引來更多國家聯合起來對抗中國」…
所以如果問廣男，其實黎智英咁耐以嚟勾結外國勢力搞香港搞國家，全部有言論、有行動、更加有「實際效果」，依家被警方依法被捕，根本咎由自取，正正顯示危害國家、特區安全嘅人，必定難逃法網！
請Follow我們的YouTube頻道：
下載我們的手機應用程式，收看第一手精彩內容：
評論