當攬炒派經常豪情壯語，講到自己抗爭決心有幾大嘅時候，廣男通常都係只得一個反應，就係「唔該，要型，就唔好縮」！但係，攬炒派政客怕痕又怕痛，尤怕失去議席，好似公民黨幾名議員咁，當日豪氣地要求美國制裁香港，但當俾選舉主任問佢哋立場嘅時候，又講一輪嘢然後「否認」，可惜最後有四個公民黨人都係要被DQ。今日，有朋友分享咗公民黨主席梁家傑喺社交媒體發布嘅一篇《紅線作繭自縛》嘅貼文我睇，內容極度反政府、反中央，對於呢啲攻擊，廣男首先想問一句，梁家傑講嘅嘢，代唔代表公民黨先？

反國安法、攬炒議會

對於梁家傑一番充滿挑釁意味嘅表述，廣男唔逐一詳細講，但可以簡單講下，所謂嘅「紅線」，包括「香港人食四方飯，與外國民間或官方素有來往」、「原則性反對港區國安法」、「全面否決政府法案及財政預算案」、「拒絕中國對港行使主權 … 是中共自絕於香港，自絕於天下」、「意圖推動民主自決、在社交網站展示『光時』標語 … 年青人出於自衛，守護原來享有的人權、自由 ...」，喺結尾，梁家傑仲話「政權」實為「作繭自縛」，不如回到「一國兩制」初衷。對於梁家傑所謂五條「紅線」，廣男點睇都似係梁家傑以至公民黨五大「反中亂港」原則多啲喎！

首先，所謂「原則性反對港區國安法」，即係梁家傑反「港區國安法」？定係公民黨都反？定係兩者都反？如果係嘅話，咁公民黨擺明唔願意擁護包括「港區國安法」在內嘅《基本法》，係咪以後唔駛參選？所謂否決政府法案同財政預算案，「DQ權在選民」，係咪梁家傑代公民黨認咗佢哋要否決政府法案、預算案係真有其事？至於「拒絕中國對港行使主權」等言論，廣男再推進一步，梁家傑唔係都搞「獨」呀？

DQ公民黨有理

梁家傑好聰明，雖然寫咗一大堆反政府、反中央嘅論述，不過佢無講呢啲表述係佢或者公民黨嘅官方「立場」，所以喺呢度，廣男想問清楚梁家傑，佢所講嘅係咪佢或公民黨嘅立場先？如果係，呢啲係咪又係DQ證據？如果唔係，梁家傑講嚟又做乜？扮型？反「港區國安法」、誓攬炒議會，依家仲連中國行使主權都攞嚟講，梁家傑呢篇帖文，值得大家保留十年，下次公民黨人士又參選，選舉主任要問返公民黨參選人，梁家傑講嘅，係咪都係「你哋立場」呀？如果唔係，「你哋會表示反對甚至譴責梁家傑，以示效忠特區嗎？」
 
原圖：文匯報

請Follow我們的YouTube頻道：

https://bit.ly/2kgU8qg

https://www.speakout.hk/ap