近日，政圈討論得最多嘅一個話題，就係中央、港府到底點處理立法會一年「真空期」，係咪委任現有議員做多年，而被DQ嘅四個議員可唔可以「留低」；據報，攬炒派今日會商討去留問題，包括係咪要「總辭」，不過，有社會人士就認為，立法會今屆任期將完結，無延期呢回事，而被DQ嘅人，不論「真空期」如何解決，都無得留低！
既無參選資格 何能續當議員
根據囍雨理解，有兩個問題，只要能夠釐清好，就會知道被DQ嘅現任議員根本唔可能「延任」。第一，今屆立法會會期喺九月底就會結束，任期完結就係完結，無話咩「延任」呢回事，就算係現有議員再出任過渡議會，都應該只係被「委任」。
至於果四位被DQ議員嘅問題，道理仲簡單，佢哋俾選舉主任DQ，係因為佢哋違反咗《基本法》、唔效忠特區，行為包括要求外國制裁香港，以至講明要攬炒立法會、香港。喺呢個情況低下，佢哋唔應該成為立法會議員，所以不論嚟緊呢一年嘅議員係點產生，佢哋一樣係無資格。
別再幻想做議員
老實講，如果大家問囍雨，今時今日呢個局面，完全係由被DQ議員自己造成，依家反而去歸咎或者攻訐特區政府，根本就無道理。最簡單一個例子，就係公民黨公開聯署、要求美國盡快通過「香港人權民主法案」制裁香港，無人逼佢哋咁做呀？自己叫外國搞香港，點可能係擁護《基本法》、效忠特區？又或者，講到明要否決政府「所有」法案同財政預算案，用常理去睇，又點可能俾佢哋「擺明車馬」攬炒香港？
DQ議員去向問題，既係法律問題，亦係一般邏輯道理，其他地方會唔會咁「古怪」地容許公職人員咁做，囍雨唔知，但香港就一定唔得！過去一年多時間，香港經歷黑暴運動同新冠疫情，已經遍體鱗傷，再俾唔合資格、想打爛香港嘅政客繼續做議員，即係俾空間、資源佢哋繼續「搞死」香港。囍雨衰啲講句，如果被DQ議員以至佢哋嘅政黨咁有「骨氣」，大可以辭職，每人七十多萬元的約滿酬金唔要，以後亦唔參選，但被DQ議員同佢哋政黨會唔會突然咁有「原則」？囍雨相當懷疑囉！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論