立法會選舉押後一年，現任立法會議員有機會延任一年，引起社會高度關注，正當年薪過百萬元嘅攬炒派議員「諗緊」如果真係可以延任，應唔應該接受政府委任之際，唔同嘅社會人士已經開始向攬炒派大台或者「司令部」發炮，填詞人林夕建議全體攬炒派議員辭職，最新消息，就係抗爭派人物鄒家成亦向攬炒派「司令部」叫陣，明言「拒絕招安 杯葛臨立會」，面對抗爭派逼宮，攬炒派議員點算好？
綜觀鄒家成嘅《拒絕招安 杯葛臨立會——告全體民主派人士書》，其重點在於「政權的委任形同招安，接受招安則是背棄港人」、「所有民主陣營的人士，若日後收到政權的委任，請即拒絕，一同杯葛這個暴政僭建出來的不義議會」；不過，抗爭派、激進派有套諗法，做緊攬炒派議員諗嘅，好似又係另一回事，例如出咗名激進嘅民主黨立法會議員許智峯，雖然聲稱要睇未來議會「合法性」同民意，但亦表明「有較多市民希望民主派寸土必爭」及「守住關鍵小數」；議會陣線立法會議員毛孟靜，就話最大考慮係「民主派能否保留關鍵否決權」。囍雨就覺得，好明顯做緊立法會議員嘅攬炒派政客，其實唔係好想辭職或拒絕委任囉！
攬炒派又被抗爭派「夾」？
老實講，主流攬炒派議員俾抗爭派「夾」或者「逼宮」，已經唔係第一次，之前抗爭派堅持「民主派初選」參加者要表明否決財政預算案以「脅逼」政府，之後成功逼令部分主流攬炒派加入聯署「抗爭聲明書」，其實已經成功「逼宮」過；不過，今次情況好唔同，事關抗爭派要攬炒派議員做嘅，係放棄每月袋十萬元、一年仲有超過270萬元辦事處開支津貼嘅高薪厚職，如果攬炒派議員跟從，就等同向「大好錢途」say goodbye。尤其甚者，如果攬炒派議員拒絕延任而被視為根本唔想擁護《基本法》同效忠特區，下次選舉隨時無得選，條數更加係以千萬元計算。換轉大家係攬炒派議員，都可能會耍「語言偽術」耍走啲抗爭派喇。
又要抗爭 又接受委任？
對於攬炒派議員而言，依家呢個唔止係兩難局面，直頭係尷尬到極，如果係抗爭到底，咁又點會接受政府委任或者延任？如果接受委任或者延任，咁又點會係抗爭，點會係反對押後選舉？若然中央、港府最後決定委任攬炒派議員做多一年，到底攬炒派議員係「要錢」定「要面」？囍雨食住花生睇好戲！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論