勾結外國勢力，要求外國制裁香港，係近年社會對攬炒派其中一個最嚴厲嘅指摘；不過，「你有張良計，我有過牆梯」，攬炒派政客「依附」咗外國勢力咁多年，點會因為其他人嘅批評就唔再同外國勢力接觸呢？最多咪改為「秘密會面」囉！近日，就有媒體獨家報道，指公民黨兩名頭頭人物梁家傑同楊岳橋，秘密地同美國駐港總領事史墨客（Hanscom Smith）「會晤」一小時，而且係史墨客隻身到梁家傑嘅律師樓見面，離開嘅時候仲「前後腳走」。囍雨真心想知道，佢哋到底傾啲咩？美國有冇俾咩Order公民黨呢？

與外國勢力「恒常會面」

根據傳媒報道，被踢爆同美國駐港總領事史墨客會面嘅梁家傑同楊岳橋，楊岳橋被追訪時就「傻笑」，梁家傑就話「交流下」，仲話係「恒常會面」。對於兩個香港政客突然秘密會見外國領事，囍雨心入面真係有好多問題，例如佢哋點解要會面？時間咁啱喺政府押後選舉同公民黨四人被DQ之後，佢哋到底傾過啲咩？

有人就指出，今次會面唔止秘密，直頭係唔尋常，如果係正常以及恒常嘅會面，點解無紀錄員陪同史墨客，而係由史墨客一人到梁家傑嘅律師行見面？梁家傑話係「恒常會面」，咁係咪佢哋都有定期會面？囍雨覺得最重要嘅係，喺佢哋會面嘅過程中，包括今次同之前嘅「恒常會面」，到底美國有冇俾咩指令梁家傑、楊岳橋佢哋？而梁、楊又有冇叫外國制裁香港？如果有，梁、楊就可能觸犯咗「港區國安法」！

公民黨有前科、信不過？

囍雨喺度要提提大家，公民黨勾結外力其實係早有前科嘅，佢哋曾經聯署去信美國參眾兩院議員要求對方快啲通過「香港人權民主法案」，即係叫人快啲「制裁」香港；聯署成員包括楊岳橋、郭榮鏗等人，公開表示過「公民黨非常支持，亦希望《香港人權與民主法案2019》能夠獲得通過。讓打壓損害香港人權的官員，需要為他們的行為後果自負。受到限制入境、資產凍結等制裁」，依家再同美國駐港總領事「秘密會面」，當中內容，極可能關乎公眾利益。

為咗釋除公眾疑慮，尤其係梁、楊二人有冇勾結外國勢力以至叫人「搞香港」，不如梁、楊或者公民黨開返個記者會交代下，反正佢哋平時咁鍾意開記者會！

原圖：RTHK

請Follow我們的YouTube頻道：

https://bit.ly/2kgU8qg

https://www.speakout.hk/app