自從有人把寫上「我要真普選」既Banner掛喺獅子山之後，好多人都話，新一代年輕人勇於爭取民主，代表既係新獅子山精神。廣男理解既新獅子山精神，包含理想、熱血、民主甚至係犧牲精神。但係，廣男並唔係完全認同呢種精神，如果新獅子山精神係有民主就可以捨棄一切既，咁呢種精神仲值得鼓勵？

之所以咁講，係因為廣男睇到一單新聞有感而發，內容係講述一個聲稱自己係女督察既自白。因為「佔中」，無時間陪仔女、同老公政見不同、休想時間唔夠都算，仲要畀人鬧係警犬、黑警，連自己下一代都要畀人咒罵。在公在私都飽受壓力，女督察都忍唔住流下女兒淚，壓力爆晒煲。

誠如果位女督察所言，做得唔好可以批評，但唔好詛咒、醜化。廣男認為爭取民主，係大部分人都支持既行動，但行動犯法本身已經值得商榷，仲要將執法者當係狗，有呢個必要咩？因為爭取民主，所以違法霸路；因為爭取民主，所以衝擊無罪；因為爭取民主，所以隨意辱罵；因為爭取民主，所以搗亂店鋪。凡此種種，係咪爭取民主就大晒先？

新獅子山精神講民主、信念，舊獅子山精神講同舟共濟、互相包容，如果只有民主，無咗互助包容既心，呢個社會會變得更好咩？有人話舊一套獅子山精神已經outdate，但廣男想講正正係因為舊一套獅子山精神，先將我哋既香港帶到今日既局面。新、舊獅子山精神兩者其實可以互助補足，何苦把兩代香港人或者把警民對立起來呢？

引用番果位自稱為女督察既結語，盼望香港能夠有多點體諒、多點愛；香港而家最欠缺既，唔係民主，係體諒同愛。

原圖：panoramio