當睇到聲稱從「泛民初選」中「退落嚟」、要返去「多休息、專注學術」嘅戴耀廷，又跳出嚟講「35+」時，大家點睇？學術研究、分析形勢？定係攬炒之心不死？所以，當今日見到戴耀廷又喺《生果報》有篇題為「35+超額完成」嘅文章時，囍雨都好有興趣睇下戴耀廷究竟依家「學術研究」啲乜，但原來講一大堆嘢，又係立法會選舉、又係「真攬炒十步」，講到直接啲，又係講奪權！
戴耀廷大概係想講，特區政府近日DQ攬炒派12個參選人、又押後立法會選舉一年，令原本只係諗住「博大霧」、要「好長時間好對步驟」先能完成嘅35+計劃，喺「低成本下加速達成」；又話泛民通過一次「初選」，就已經「令中共及特區政權完全亂了陣腳」，「35＋的目標亦已超額完成」；日後如果「更多人走到政權的對立面，使統治成本進一步加重」，就可以視為「35+額外的『政治花紅』」…
戴耀廷謀殺香港之心不變
講真，囍雨睇完第一感覺，係戴耀廷跌落地都要揦番揸沙，如果35+真係諗住「博大霧」，戴耀廷你唔早啲講？依家衰咗，先嚟「死雞撐飯蓋」？！不過呢啲都未係重點，重點係囍雨想大家睇清楚，依家戴耀廷講咁多嘢，實質意圖係乜！
嗱，按照戴耀廷嘅「分析」，因為「特首及中央」真係信35+可以做到，所以DQ攬炒派參選人、押後選舉，但咁就令到原本要「好長時間、走很多步」嘅目標一下子達成，即係話，戴耀廷由頭到尾都係要推行佢嘅「真攬炒十步」；再睇落去，當戴耀廷話「政權加大打壓力度」，「國際社會的制裁陸續有來」時，囍雨嘅理解係，戴耀廷從來都冇放棄過要求外國勢力搞香港、搞中國！總括嚟講，大家可以用一句話去形容戴耀廷，就係推香港「跳崖」、謀殺香港之心始終不變！
想有何「巨變」？請戴耀廷解釋！
尤其，當戴耀廷喺文章結尾又講到未來一年「重整力量」、「為有可能快要出現的巨變」做好準備時，大家應該叫戴耀廷唔好再咁隱晦、又要威又要戴頭盔，不如講清楚所謂「巨變」係意欲何指？又想講奪取有望、香港獨立有機？仲有，想叫人做好咩「準備」？準備做乜？
老實講，喺戴耀廷身上，囍雨睇到嘅，係「死性不改」四個字，自己犯法、又教人犯法，仲要煽動抗爭、以實際行動推行攬炒甚至想「巨變」，呢種人，點可以俾佢繼續做大學教授？即炒，是應該的決定！囍雨仲有個建議，大家應該將戴耀廷由過去到現在講過嘅嘢、出過嘅文章，都清清楚楚睇多次、留番低，話唔定，將來有可能成為「呈堂證供」呢！
請Follow我們的YouTube頻道：
下載我們的手機應用程式，收看第一手精彩內容：
評論