港大校委會決定即時解僱戴耀廷，唔少社會人士都表示歡迎港大決定，有啲甚至認為係彰顯公義。廣男睇新聞，見到有報道引用戴耀廷向港大提出嘅「抗辯」陳辭，戴耀廷稱自己案件不涉誠信、濫權、剝削學生或盜用資金或資料等，又稱定罪與欺詐、暴力或性罪行無關，擺出一副有如「就算犯法，所犯之法都不構成解僱」嘅樣子；廣男想問下，咁戴耀廷所犯嘅，係唔係刑事罪行？而戴耀廷本人，又係咪煽動過其他人犯法先？

「聰明」的陳辭

綜觀戴耀廷向教委會同校委會嘅陳詞，廣男覺得戴耀廷相當「聰明」，「聰明」在於佢好識得避重就輕，但廣男要問，佢所犯案件不涉誠信、濫權等等，但佢所犯嘅係咪足以被判入獄嘅刑事罪行先？（如戴上訴成功另作別論）如果係，校方要解僱佢，唔係無理由喎！

至於戴耀廷話自己所犯案件不涉及暴力罪行，廣男有兩個問題，第一就係因違法佔領而引起嘅暴力行為，戴耀廷無法律責任，但佢有冇道德責任呢？第二就係，戴耀廷鼓勵人犯法，又係咪一個教師或教授應有所為呢？戴耀廷嘅陳辭，就好似話俾人聽「我只係犯咗A、B罪行啫，但C、D、E甚至F罪行我無觸犯喎，你無理由炒我喎」，大家覺得合唔合理？

曾撰文合理化「私了」行為

另外，戴耀廷強調違法佔領係以和平及非暴力為原則，裝出一副唔支持暴力嘅姿態，但廣男睇返戴耀廷過去嘅「鴻文」，咁啱就有一篇佢意圖用歪理去合理化「私了」行為，戴耀廷喺文章引用其他學者稱「當體制存在固有的失效，令人民暴露於嚴重的危害，只要私了行為所用的武力是用於保護自己或其他人，那就可以是合理的」，戴耀廷係「和理非」，定係隱晦地煽動暴力，大家心裡明白啦。

係咪要解僱戴耀廷，廣男始終覺得呢個係常識問題，假設有一個大學教授，佢犯下刑事罪行，煽動其他人違法，甚至以歪理去「合理化」暴力行為，呢個教授，唔應該被解僱咩？最重要一點係，直到呢一刻，戴耀廷似乎都無認錯、知錯！


原圖：文匯報

請Follow我們的YouTube頻道：

https://bit.ly/2kgU8qg

https://www.speakout.hk/app