噚日，有傳媒引述消息，鑑於疫情嚴峻，立法會選舉將會延期一年。一如所料，攬炒派又即刻發揮其「盲反」本色，例如新界西立法會議員朱凱廸，就話中央、政府「驚輸、驚美帝」，另一新界西立法會議員郭家麒，直頭話「投票引發病毒傳播風險極低」、以疫情為由延遲選舉係「藉口」。廣男實在唔明白，擺喺我哋眼前嘅，係實實在在嘅疫情散播風險，難道攬炒派眼中只有政治，市民生命安危，都不值一哂？

這不是贏輸的問題！

套用朱凱廸嘅講法，政府係因為「怕輸」先將選舉延期，廣男就覺得，呢個唔係咩選舉「贏定輸」嘅問題，而係依家疫情散播得咁快，過去幾日，日日都過百宗確診個案，如果強行搞投票而令疫情爆發，係咪由朱凱廸負責？如果真係要講「贏輸」，有起事上嚟，輸嘅就一定係可能受感染嘅香港市民。

至於郭家麒稱「投票引發病毒傳播風險極低，因投票站會限制人數，每格投票只有一人，只要做到所有人戴口罩、保持1.5米社交距離、場地提供消毒酒精搓手三點，就更難傳播病毒」，廣男又想問下，排隊投票時同其他人距離好近，無問題？如果有人喺排隊期間除低口罩飲嘢、食嘢，唔危險？又或者入到票站，接觸到其他人掂過嘅選票、印章等等，又會「傳播風險極低」？郭家麒身為醫生，唔會諗唔到呢啲問題呀？

延遲選舉 國際慣例

另外，郭家麒指韓國、新加坡同樣在疫情下如期大選，其實，廣男想請郭家麒睇下，呢兩個國家關於大選與疫情嘅問題。例如南韓，佢哋係喺四月中搞大選，不過人口超過5,000萬人嘅南韓，喺大選前後嘅確診個案都好少，例如選舉前一星期，成個星期得207宗個案，選舉日有22宗，選舉後一星期都係得89宗，一個明顯已經控制疫情嘅地方，香港點同佢比？至於新加坡，選前一個星期大約有1,100宗個案，選舉日就有190宗，到選舉後一個星期，整星期已經錄得1,841宗個案，再下一個星期又升至1,922宗個案，之後7月25日更單日錄得過500宗個案，如果香港要同新加坡比，即係要香港引發新一輪疫情爆發？

有好多新聞都指出過，因為疫情關係，全球已經有68個國家或地區選擇延遲選舉，當中包括英國、法國、德國甚至美國。點解攬炒派唔舉呢啲例子？因為佢哋為咗選舉、奪權，可能已經將市民福祉拋諸腦後。疫情故然無情，但原來本港嘅攬炒派政客，更加無情！ 

郭家麒、朱凱廸參選立法會新界西選舉，其他參選人包括民建聯陳恒鑌名單、民建聯周浩鼎名單、工聯會麥美娟名單、何君堯名單、熱血公民鄭松泰、實政圓桌田北辰、屯門社區網絡張可森、黃子悅、梁飛雪、天水連線伍健偉、民主黨尹兆堅、黃天佑；擬參選人士則有巫堃泰。 

圖片來源：文匯報

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk